Ամեն անգամ, երբ իշխանությունները փորձում են սահմանադրությունը փոխել, տեսակետներ են հնչում, որ իր վերարտադրման հարցն է լուծում ու ուզում է պարզապես օրվա իշխանությունը երկարաձգել պաշտոնավարումը: Հենց այս պատճառաբանությամբ ընդդիմությունը բոյկոտում է ու չի մասնակցում սահմանադրական բարեփոխումների գործընթացին։
Այսօր, Սահմանադրական բարեփոխումների խորհրդի երկրորդ նիստից հետո արդարադատության նախարար Կարեն Անդրեասյանին այս առնչությամբ հարցրեցինք՝ ինչպե՞ս կարող եք փարատել այս մտահոգությունները, որ սրանով Նիկոլ Փաշինյանը չի ուզում երկարաձգել իր իշխանությունը:
Նա պատասխանեց. «Այս սահմանադրությունը թույլ է տալիս վարչապետին անվերջանալի երկարաձգել իր վարչապետությունը: Եթե պետք լինի, կարող է 5 անգամ էլ վարչապետ ընտրվել, 10 անգամ էլ, որեւէ սահմանափակում չկա: Նախկին փորձի, կամ սեփական արշինով չափել ամեն մի նախաձեռնություն ճիշտ չի լինի: Եթե որեւէ ցանկություն լիներ ուղղակի ուժեղ վարչապետական համակարգով անվերջ պաշտոն ունենալ, ապա այս սահմանադրությունը դրա բոլոր հնարավորությունները տալիս է»:
Հռիփսիմե ՋԵԲԵՋՅԱՆ
