Aravot.am-ի տեղեկություններով, Ա․Մ․-ն, ձևանալով որպես «Հայաստան համահայկական հիմնադրամ»-ի աշխատակից և խաղերի կազմակերպիչ, այցելել է Գյումրու կենտրոնական հատվածներից մեկում՝ Տեքստիլագործների թաղամասում գտնվող «Գյումրի» հյուրանոց ու մեծ վնասներ հասցրել տիրոջը։
Նա 2019թ. հունիսի 12-ից մինչև հունիսի 13-ն ընկած ժամանակահատվածում խաղերին մասնակցող երեխաների համար ամրագրել է 24 հյուրանոցային համարներ՝ օգտվելով գիշերակացից, օրական 3 անգամ սնվելու ծառայություններից՝ հյուրանոցատիրոջը պատճառելով 4.204.000 դրամի վնաս:
Ա.Մ․-ն հիմնադրամի տնօրենի անունից և հիմնադրամի ռեկվիզիտներով կեղծ գրություն է ներկայացրել հյուրանոց, որ հիմնադրամը պարտավորվում է վճարել նշված գումարը, սակայն տարբեր պատճառաբանություններով խուսափել է հյուրանոցին պարտք մնացած գումարը վճարելուց։
Փաստի առթիվ ՀՀ ԱԱԾ քննչական դեպարտամենտում հարուցվել է քրեական գործ՝ ՀՀ Քրեական օրենսգրքի 184 հոդվածի 2-րդ մասի 1-ին կետի հատկանիշներով: Այն է՝ Գույքային վնաս պատճառելը խաբեության կամ վստահությունը չարաշահելու եղանակով։
Կատարվում է նախաքննություն:
