«Աննա Դանիբեկյանը որոշել է տուգանել Ռոբերտ Քոչարյանի պաշտպաններին»,- քիչ առաջ հայտնեց Ռոբերտ Քոչարյանի փաստաբանական խմբի մամուլի քարտուղար Էլինա Սահակովան:
Ինչպես արդեն տեղեկացրել ենք, Ռոբերտ Քոչարյանի և Արմեն Գևորգյանի գործով դատական նիստի ժամանակ ի նշան բողոքի Ռոբերտ Քոչարյանի պաշտպաններ Հովհաննես Խուդոյանն ու Հայկ Ալումյանը լքեցին նիստերի դահլիճը: Նրանք պահանջում էին, որ նախագահող դատավոր Աննա Դանիբեկյանը պարզաբանի մեղադրանքը:
Մինչդեռ Աննա Դանիբեկյանը որոշեց սանկցիա կիրառել նրանց նկատմամբ: Էլինա Սահակովան մասնավորապես հայտնում է. «Երևան քաղաքի ընդհանուր իրավասության դատարանի դատավոր Աննա Դանիբեկյանը որոշում է կայացրել տուգանել ՀՀ երկրորդ նախագահ Ռոբերտ Քոչարյանի պաշտպաններ Հովհաննես Խուդոյանին և Հայկ Ալումյանին՝ յուրաքանչյուրին 50 հազար դրամի չափով։ Դատական սանկցիա կիրառելու վերաբերյալ դատական ակտը հրապարակվել է քիչ առաջ։ Նշենք, որ սույն դատական ակտը ենթակա է բողոքարկման վերադաս ատյանում։ Հաջորդ դատական նիստը տեղի կունենա փետրվարի 22-ին։
Տաթև ՀԱՐՈՒԹՅՈՒՆՅԱՆ
