«Փորձում են իրական դավաճաններին կոծկել եւ ինչ-որ ողորմելի խումբ ներկայացնել, թե տեսեք` սրանց պատճառով ենք տանուլ ենք տվել, մեր հաղթանակն ենք կորցրել։ Իրականում դրանք այն տեսակներն էին, որ անգամ իրենց տեսածը չեն կարող լրջորեն փոխանցել»,-«Հայելի» ակումբում նշեց բանաստեղծ Խաչիկ Մանուկյանը` խոսելով այն հաղորդագրության մասին, թե փաստական տվյալներ են ձեռք բերվել օտարերկրյա հատուկ ծառայությունների կողմից ՀՀ տարածքում գործակալական ցանց հիմնելու և վարձատրության դիմաց ի վնաս ՀՀ ինքնիշխանության, տարածքային անձեռնմխելիության և արտաքին անվտանգության թշնամական գործունեություն ծավալելու վերաբերյալ:
«Դրանք ինչպե՞ս կարող են լրտեսություն անել, իհարկե որեւէ արդարացում չունեն այդ լրտեսները, բայց ես հիմա հասկանում եմ, որ այս մանր ձկներով խնդիրը չի լուծվելու եւ ոչ էլ գլխավոր դավաճաններն են պատասխանը տալու: Ես վերջերս ավելի լուրջ խնդրի ականատես եղա, քանի որ չեմ կարողանում հետեւել դրա (Նիկոլ Փաշինյանի-Գ.Հ.) ելույթներին, ձայնը չեմ կարողանում լսել, համացանցից տեղեկացա, որ ասել է, թե պատկերացում չունեի, որ հոսանքը կթանկանա եւ այլն: Ու հիմա սուտ խոստումներ է տվել, շարունակությունն էլ լինելու է այսպես` ես պատկերացում չունեի, որ պատերազմն էսպես է լինում, որ մարդիկ իրենց սպանում են, պատկերացում չունեի, որ բարեկիրթ Ալիեւը կհարձակվի: Սիրողական մակարդակով մեկին բերել ենք, ու հիմա մանր լրտեսիկներով փորձում են ինչ-որ խնդիրներ ներկայացնել: Եթե սա է բացահայտումը, հասկանալի է, որ որեւէ միտվածություն չկա իրական հանցագործներին ցույց տալու եւ ցանկություն ու հնարավորություն էլ չունեն»,- ասաց Խաչիկ Մանուկյանը:
Ապա հավելեց. «Ուզում եմ հետ գնալ այն պահը, երբ Սերժ Սարգսյանը հայտարարեց, թե Նիկոլը ճիշտ էր, ես սխալվեցի… Ուզում եմ հակադարձել պարոն Սերժ Սարգսյանին, դուք սխալվեցիք, Նիկոլը ճիշտ չէր…Նա եկավ, այսպես շարունակվեց, սխալը սխալի վրա դնելով…Շատերն ինձ ասում են՝ դու նախկիններից գո՞հ ես, որ այսպես հիմա ներկայացնում ես: Այսինքն ի՞նչ է ստացվում, որ եթե նախկինում մի մերժելի վիճակ, երեւույթ եղել է, ուրեմն պիտի հանդուրժե՞նք մերժելիության ներկայիս տեղատարափը… Եթե մի հանցանք եղել է, պիտի հիմա է; հանցանքների տեղատարափը հանդուրժե՞նք` վկայակոչելով նախկինը…»:
Գոհար ՀԱԿՈԲՅԱՆ
