Սուրիոյ Հայ Դատի Յանձախումբը իր մտահոգութիւնը կը յայտնէ Արցախեան վերջին պատերազմին հետեւանքով բռնագրաւուած հայկական հողերու մշակութային կոթողներու ճակատագրին գծով յատուկ յանձնախումբ ստեղծելու Ազրպէյճանի իշխանութիւններուն որոշումին համար, որ կը նպատակադրէ՝ հայկական սրբատեղիներու, պատմամշակութային կոթողներու եւ տեղանուններու նենգափոխումը, ինչպէս նաեւ շրջանի հայկական հետքերու ջնջումն ու այդ հարստութեան իւրացումը։
Տուեալ քայլը անգամ մը եւս կու գայ հաստատելու այն ակնյայտ փաստը, որ ազրպէյճանական իշխանութիւններու վերահսկողութեան տակ գտնուող հայկական մշակութային ժառանգութիւնը ենթակայ է իր պատմական արմատներէն պոկուելու իսկական վտանգին: Սոյն արարքը միջազգային հանրութեան եւ փորձագիտական շրջանակներուն մօտ յստակ համոզում կը յառաջացնէ, թէ մշակութային եւ կրօնական կոթողներու, սրբատեղիներու ոչնչացումն ու սրբապղծումը ոտնձգութիւն են ժողովուրդներու արժանապատւութեան, իսկ Ազրպէյճան կը նպատակադրէ մէկընդմիշտ խափանել պատմական փորձութիւններուն դիմակայելու եւ զարգանալու հայ ազգին կարելիութիւնը։
Ան, ինչպէս անցեալին, այսօր եւս կը շարունակէ իր հակահայկական քաղաքականութիւնը։ Եթէ Ազրպէյճանի համար Ղարաբաղեան հակամարտութիւնը սկզբնական փուլով կը ծառայէր պատմութեան եւ մշակոյթի դէմ մեքենայութիւններ հիւսելու՝ արդարացնելու նախկին Ազրպէյճանական Խորհրդային Հանրապետութենէն հայկական բնակչութեան բռնի տեղահանումը, ներկայիս Ազրպէյճան կը միտի Արցախի դէմ ի գործ դրուած ռազմական ուժի ապօրինի կիրարկումը օրինականացնել:
Արդարեւ, Սուրիոյ Հայ Դատի Յանձնախումբը խստիւ կը դատապարտէ Ազրպէյճանի կողմէ կիրառուած մշակութային ցեղասպանութիւնը հայ ժողովուրդին նկատմամբ, նաեւ կոչ կ՛ուղղէ միջազգային հանրութեան կանխարգիլելու եւ կասեցնելու Ազրպէյճանի անմարդկային եւ գազանարար արարքը, եւ զայն միջազգային ատեաններու մօտ դասելու, որպէս պատերազմական ոճիր:
Կարդացեք նաև
ՍՈՒՐԻՈՅ ՀԱՅ ԴԱՏԻ ՅԱՆՁՆԱԽՈՒՄԲ
