«Նախ փաստենք, որ պնդումը, թե հանրային քննարկումները պատշաճ ձեւով չեն իրականացվել, այդպես չէ։ Բացի այդ, ընդունում եմ, որ ճանապարհային երթեւեկության անվտանգության բարձրացման ուղղությամբ ԱՊՊԱ կազմակերպությունները միջոցառումներ չունեն»,-խորհրդարանում այսօր ԱԺ պաշտպանության եւ անվտանգության հարցերի հանձնաժողովի փոխնախագահ, ՔՊ-ական պատգամավոր Արմեն Խաչատրյանի նախաձեռնությամբ կազմակերպված՝ բազային ապահովագրավճարի չափի ավելացման վերաբերյալ քննարկման ժամանակ հայտարարեց Արմեն Խաչատրյանը։
Նա շեշտեց․ «Հետեւում եմ ՌԴ-ում ԱՊՊԱ գործակալությունների կատարած լուրջ միջոցառումներին, հատկապես՝ քարոզչական աշխատանքում լուրջ ներգրավվածությանը․ պաստառներ, տեսահոլովակներ, սեզոնային վիճակագրություն։ Որ հատվածում որ վթարների աճ է լինում, իրականացվում են կանխարգելիչ միջոցառումներ, եւ ՃՏՊ-ների քանակը նվազում է, որի շահառուն ԱՊՊԱ-ն է առաջնահերթ։ ՀՀ-ում չեմ տեսնում, որ ԱՊՊԱ բյուրոն եւ ԱՊՊԱ գործակալությունները ՃՏՊ-ների նվազեցման հարցում ձեռք ձեռքի տան ոստիկանության հետ ու միջոցառումներ անեն։ Նրանք լուրջ վերահսկողական միջոցառումներ կարող են անել հենց ոստիկանության վրա, որովհետեւ դա հասարակական վերահսկողության ձեւ է։ Միջոցառումներով հնարավոր է 5%-ով վթարների քանակը նվազեցնել եւ թանկացման անհրաժեշտություն չունենալ։ Սա իմ պարզունակ հաշվարկն է»։
Հիշեցնենք, որ ԱՊՊԱ պայմանագիրը թանկացել է տարեկան 3 հազար դրամով, սակայն բոնուս-մալուս համակարգում էլ փոփոխություն է կատարվել, որով որոշակի գումարի վթարի եւ հատուցման պարագայում վարորդի հաջորդ ԱՊՊԱ պայմանագիրը զգալիորեն թանկանում է։ Վարորդների դժգոհությունն է հարուցել նաեւ այն հանգամանքը, որ եթե ոչ թանկարժեք մեքենայի վարորդը վթարային իրավիճակում հայտնվի, վթարը տեղի ունենա իրենից անկախ, բայց ինքը համարվի վթարի պատճառ ու թանկարժեք մեքենային վնաս պատճառի, ապա վթարը պատճառողի համար, պատճառած վնասից կախված, հաջորդ ԱՊՊԱ պայմանագիրը մեծ չափով է թանկանալու։
Լուիզա ՍՈՒՔԻԱՍՅԱՆ
