Շիրակի մարզում կորոնավիրուսը բավական մեծ տարածում է գտել․ օրական նմուշառվող քաղաքացիների կեսից ավելիի թեստերի պատասխանները դրական են։ Սա հարկադրել է առողջապահության ոլորտի պատասխանատուներին վերաբացել Գյումրի բժշկական կենտրոնի կորոնավիրուսային բաժանմունքը։
Բաժանմունքի վերաբացվելուն պես` ստացիոնար բուժման են տեղափոխվել 19 քաղաքացիներ, կեսը Լոռու մարզից, կեսն էլ Շիրակի մարզի տարբեր տեղանքներից։ Իսկ տրիաժ կենտրոնում այս պահին կան 15-ից ավելի հիվանդներ։
Այս մասին մեզ հետ զրույցում տեղեկացրեց Գյումրի բժշկական կենտրոնի փոխտնօրեն, կորոնավիրուսային բաժանմունքի պատասխանատու Արմեն Խաչատրյանը։
«Հիվանդները տարբեր տարիքի են, նրանց մոտ առկա է թոքաբորբ։ Չես կարող վստահորեն ասել՝ նրանց մոտ օմիկրոն շտա՞մն է, թե՞ դելտան»,-ասաց Արմեն Խաչատրյանը։
Կարդացեք նաև
Հիշեցնենք, որ ընդամենը մեկ շաբաթ առաջ Գյումրու «Քաղաքացիական պայմանագիր» կուսակցության անդամների գերակշիռ մասը չէր ներկայացել ավագանու նիստին՝ հիվանդ լինելու պատճառով, Գյումրու համայնքապետարանի «Կոմունալ ծառայություն բյուջետային հիմնարկ»-ի 30 աշխատակից էլ անաշխատունակության մեջ էին, նրանք միանգամից վարակվել էին կորոնավիրուսով։
Նունե ԱՐԵՎՇԱՏՅԱՆ
