«Նոյեմբերի 25-ին խորհրդարանական լսումների ժամանակ ելույթ եմ ունեցել, գնահատականներ հնչեցրել: Հիմքում այդ գնահատականներն էին»,- դուրս գալով ՀՀ Քննչական կոմիտեի Արաբկիր քննչական բաժնից՝ լրագրողների հետ զրույցում հայտարարեց նախկին պատգամավոր, քաղաքական վերլուծությունների «Ակունք» կենտրոնի տնօրեն Ռուբեն Հակոբյանը:
Նա հայտնեց՝ սկզբից իրեն ոստիկանություն էին հրավիրել՝ երկու ամիս առաջ, մտածել է՝ դրանով կավարտվի, սակայն այսօր ևս հրավիրել են: Նա շարունակեց. «Բայց պարզվում է՝ քրեական գործ են հարուցել, և որպես վկա կասկածյալի կարգավիճակով ես օգտվեցի իմ իրավունքից և ցուցմունք չեմ տվել»:
Ռուբեն Հակոբյանն ասաց՝ կարծես ճակատագրի հեգնանք լինի: Ըստ նրա՝ նա, ով այսօր դատական իշխանությունն իր ձեռքին է կենտրոնացրել, այդ մարդը 1996-ին կարողացավ դատական համակարգը, ըստ Ռուբեն Հակոբյանի՝ ոչնչացնել. «Այդ մարդը Գագիկ Ջհանգիրյանն է: Այն ժամանակ պայքարեցի, արդյունքում հայտնվեցի ԱԱԾ մեկուսարանում, այն ժամանակ ավելի ծանր հոդված էր. երկու մահապատիժ: Ինքը չպատժվեց և շարունակեց չպատժվել։ Չպատժվեց նաև, երբ 1999-ի հոկտեմբերի 27-ին, երբ իր ընկերոջ՝ Վազգեն Սարգսյանի մարմինը տաք էր, պահանջում էր, որ իրեն գլխավոր դատախազ նշանակեն: Այնուհետև ինքն այդ նենգ խմբի հետ փորձեց հեղաշրջում իրականացնել, կրկին չպատժվեց: Հիմա ռևանշ է անում: Ես արհամարհում եմ Գագիկջհանգիրյանական արդարադատությունը: 1996-ին իմ վախը բռնել են: Եթե ուզում են ինձ վախեցնել, իզուր: Բայց իրենք այս անգամ անպատիժ չեն մնա, քանի որ ոչնչացնում են պետությունը»:
Ռուբեն Հակոբյանի պաշտպան Վարազդատ Հարությունյանը նշեց. «Գործը հարուցվել է քրեական օրենսգրքի 137 պրիմ հոդվածով՝ հանցակազմը՝ արժանապատվությունը ծանր կերպով վիրավորելն է: Որպես իրավաբան ու փաստաբան գտնում եմ, որ պարոն Հակոբյանի գնահատականը, թե սա քաղաքական հետապնդում է, ճշգրիտ է»:
Կարդացեք նաև
Փաստաբանը համարում է, որ այս հոդվածը դարձել է գործիք քրեական հետապնդում իրականացնող մարմնի միջոցով իշխանության կողմից քաղաքական ընդդիմախոսներին ազատ կարծիք արտահայտելու իրավունքը սահմանափակելու, նրանց լռեցնելու համար: Այս առիթով նա մանրամասնեց. «Այնպիսի տպավորություն է, որ ոստիկանությունում նոր բաժին է ստեղծվել, որտեղ ոստիկանները վերլուծում են այս կամ այն ընդդիմախոսի ելույթը ու փորձում հասկանալ՝ դրանցից Նիկոլ Փաշինյանի անձը վիրավորվո՞ւմ է, թե՞ ոչ»:
Փաստաբանը վստահեցրեց՝ այս հոդվածով հարուցված գործերը գնալու են Եվրոպական դատարան:
Հարցին՝ ի՞նչ գործողությունների են իրենք դիմելու, Վարազդատ Հարությունյանը պատասխանեց. «Գնդակը քրեական հետապնդում իրականացնող մարմնի դաշտում է: Եթե քննիչը գնահատի գործը, հասկանա, որ հանցակազմ կա, պետք է մեղադրանք առաջադրեն, մեզ էլի հրավիրելու են: Հնարավոր է՝ քննիչը քրեական գործը կարճի»:
Տաթև ՀԱՐՈՒԹՅՈՒՆՅԱՆ
