«Անասնաբույժը ստանում է 30-45 հազար դրամ աշխատավարձ, ինչն այսօրվա պայմաններում գրոշներ են»,-այսօր այսպիսի դժգոհություն հայտնեցին մի խումբ անասնաբույժներ, որոնք էկոնոմիկայի նախարարության առջեւ բողոքի ցույց էին անում: Նրանք վիրավորված են, որ այդքան կարեւոր մասնագետ լինելով հանդերձ՝ կառավարության կողմից անտեսված են:
Անասնաբույժները եկել էին Կոտայքի եւ Լոռու մարզերից: Ասում են՝ անցյալ ամռանը նամակ են գրել վարչապետ Նիկոլ Փաշինյանին, բայց որեւէ արձագանք չի եղել, երբ դիմում են, ասում են՝ համբերեք: Նրանց խոսքով, լինելով համայնքային անասնաբույժներ, այնքան ցածր են վարձատրվում, որ երիտասարդ սերունդը չի ուզում ընտրել այդ մասնագիտությունը:
Ըստ նրանց, ոլորտում այժմ 70-ն անց տարիքի մասնագետներն են մնացել. «Անասնաբուժությունը, որպես գյուղատնտեսության կենտրոնական մասնագիտություն, հոգածության կարիք ունի, բայց այն անտեսված է պետության, կառավարության ու մասնագիտական կառույցների կողմից: Ասում են՝ սննդի անվտանգությունը կարեւոր է, սպանդանոցները կարեւոր են, բայց ո՞ւմ միջոցով դա պետք է արվի: Կյանքը դարերով ապացուցել է, որ կադրերն են որոշում ամեն ինչ, եթե մենք կադրերին ոչնչացնում ենք, նոր կադրեր էլ չունենք՝ ո՞վ պետք է որոշի: Թղթի վրա ո՛չ մածուն կա, ո՛չ կաթ կա, ո՛չ միս կա, ո՛չ էլ՝ առողջ սնունդ: Եղած անասնաբույժների աշխատանքային տարիքը վաղուց լրացել է, կադրերի խնդիր ունենք, անասնաբուժությունը գայթակղիչ մասնագիտություն չէ, ցածր աշխատավարձի պատճառով մարդիկ չեն ուզում դառնալ, եղած կադրերն էլ քաղաքում շուն ու կատու են սպասարկում»:
Կարդացեք նաև
Ցույցի մասնակիցները պահանջում են, որ կառավարությունը սահմանի համայնքային անասնաբույժի դրույքաչափ, վարձատրությունն էլ սահմանի գոնե հանրապետության միջին աշխատավարձին համապատասխան, բացի այդ նախատեսի սոցփաթեթ՝ բժշկական ապահովագրությամբ, նաեւ տրամադրի անձնական պաշտպանական պարագաներ: Նրանց խոսքով, անասնաբույժներն աշխատում են համաճարակային պայմաններում եւ նրանց մեծ մասը «վաստակում» է վտանգավոր հիվանդություն, որը մնում է նրանց ողջ կյանքում:
«Բրուցելյոզով վարակվելու դեպքում մարդն ամբողջ կյանքը մնում է հաշմանդամ: Կամ՝ մտնում եք ֆերմա 50 հատ ցուլ է կապած, մեկին ոտքով են խփում, մեկին կոտոշով, ախով-վախով աշխատում ենք, 70 տարեկան մեկն է, 70 էլ՝ էն մյուսը: Սրանք ամենաերիտասարդ մասնագետներն են: Մեր բուհերը անասնաբույժի մասնագետներ գրեթե չեն պատրաստում, մասնագիտությունը չի հրապուրում: Ես շատ մասնագետներ գիտեմ, որ գնացել են հրուշակեղենում աշխատում են, 400 հազար դրամ են ստանում՝ ինչո՞ւ պետք է գան, կյանքը վտանգելով այս գործն անեն»,-ասում էին նրանք:
Անասնաբույժների խոսքով, այդ հարցով դիմել են նախորդ կառավարությանը, իշխանափոխությունից հետո հույսով լցվել են, որ ինչ-որ բան կփոխվի, բայց ոչ մի փոփոխություն չի եղել:
Նրանց հաշվարկներով, կադրերի այնպիսի պակաս կա, որ հանրապետության գրեթե 900 բնակավայրերի 60 տարին մեկ, մի գյուղին մեկ անասնաբույժ է հասնում:
Անասնաբույժների խոսքով, կառավարությունն անտեսում է այսպիսի կարեւոր ոլորտը՝ ողջ ուշադրությունը սեւեռելով իրավապահ համակարգին, որտեղ նկատելի բարձրացել են աշխատավարձերը, սակայն, ըստ անասնաբույժների, չպետք է մի ոլորտի զարգացումը մյուսի հաշվին լինի. «Դրանով նրանք ավելի են խորացնում հանրապետությունը լքելու տրամադրությունները: Անասնաբույժն իր մասնագիտությամբ իր ընտանիքը չի կարող կերակրել, բայց մեզ ասում են՝ համբերեք: Մարդիկ ընտանիքներ են պահում, օրվա հացի խնդիր ունեն»:
Անասնաբույժներից մեկի խոսքով, իրենք վարձատրվում են մեկ գլուխ անասունի հաշվով, եւ 47 դրամով այդ գումարը բարձրացնելը որեւէ խնդիր չի լուծել: Նրա ներկայացմամբ, անցյալ տարի 120 դրամից գլխի գինը դարձրել են 167 դրամ, բայց, փոխարենը կրճատել են հավերի եւ խոզերի ժանտախտի միջոցառումները, ինչի արդյունքում, ոչ թե ավելացել է աշխատավարձը, այլ՝ հավերին ու խոզերին հանելով միջոցառումների ցանկից, աշխատավարձերը մի բան էլ նվազել են. «Ես սպասարկում էի 1200 գլուխ խոզ, ինչը տարեկան 220 հազար դրամ կազմում էր: Հիմա պահանջում ենք մեկ գլխի համար մեզ վճարեն 200 դրամ: Դա էլ մի գումար չի, բայց գոնե չնչին հարց կլուծի: Ամպագոռգոռ ասում ենք՝ եվրոպացի ենք, բայց Եվրոպայում անասնաբույժը 4 հազար եվրո գումար է ստանում: Մենք, այնպես չէ, որ ամեն ամիս միջոցառում ենք անում, վեց ամիս անում ենք, վեց ամիս չենք անում, այսինքն՝ վեց ամիս մենք չենք վճարվում»:
Լուսինե ԲՈՒԴԱՂՅԱՆ
