«Ընդդիմությունը կարող է ներկայացնել հրավիրյալների ցանկ: Ամեն անգամ գոռում են, որ չեն կարողանում վարչապետի հետ հանդիպեն, որ պետք է բաց լինի, փակ լինի եւ այլ, կարող էին վարչապետին հրավիրեին ու տային իրենց հարցը: Այդ հանձնաժողովի օբյեկտիվության երաշխավորությունից մեկն այն էր, որ 7/4 հարաբերակցությամբ կար ընդդիմություն-իշխանություն, բա եթե օբյեկտիվությունից եք խոսում, ձեր արածն ո՞ւր է, եկեք ապահովեք այդ օբյեկտիվությունը: Ավելին՝ իրենք փող են ստանում դրա համար, իրենց աշխատանքային պարտավորվածությունն է, որ գային, մասնակցեին հանձնաժողովին ու աշխատավարձ ստանային: Սա էլ էր խրամատ, որ իրենք լքեցին»,- այսօր լրագրողների հետ զրույցում ասաց 44-օրյա պատերազմի հանգամանքներն ուսումնասիրող հանձնաժողովի անդամ Արմեն Խաչատրյանը:
Հիշեցնենք, որ այսօր 2020-ի սեպտեմբերի 27-ին սանձազերծված 44-օրյա պատերազմի հանգամանքներն ուսումնասիրող քննիչ հանձնաժողովի առաջին նիստն էր, որից հետո հանձնաժողովի անդամները ասուլիսով հանդես եկան: «Հայաստան» եւ «Պատիվ ունեմ» խմբակցությունները մինչ այդ հայտարարություն էին տարածել, որ չեն մասնակցելու այդ հանձնաժողովի աշխատանքներին:
Արմեն Խաչատրյանն ասաց, որ «Պատիվ ունեմ»–ի անդամ Տիգրան Աբրահամյանը ամեն անգամ բողոքում է, որ իրեն չեն թողնում առաջնագիծ գնա, մոնիտորինգ անի, հասկանա՝ ինչ է կատարվում. «Բա Տիգրա՛ն Աբրահամյան, սրանից լավ հասկանալու տե՞ղ: Կանչի, հարցաքննի, հասկացի, վերլուծի ու այս երկրի համար մի բան էլ դու արա, առաջ տար»:
Կարդացեք նաև
Անդրադառնալով ընդդիմության այն փաստարկին, որ այս իշխանության օրոք չի կարող լինել օբյեկտիվ քննություն, քանի իշխանություն է ՔՊ-ն՝ որեւէ հարցում օբյեկտիվություն ակնկալել չենք կարող՝ ասաց. «Բա եթե այդպես է, ուրեմն թող ընդհանրապես մանդատները դնեն, գնան, որեւէ բանի չմասնակցեն այլեւս: Իրենց այս գործողություն ուղղված է ՀՀ-ի դեմ, ՀՀ ազգային անվտանգության դեմ»:
Նշենք, որ այս պահին որեւէ արտախորհրդարանական ուժ ներգրավված չէ քննիչ հանձնաժողովի աշխատանքներին: Ամեն անգամ նիստի անդամները տեղում հընթացս կորոշեն՝ մասնակցե՞ն, թե՞ ոչ ու ում հրավիրեն:
Հռիփսիմե ՋԵԲԵՋՅԱՆ
