«Ադրբեջանի հետ խաղաղության պայմանագիրը միշտ եղել է որպես վերջնանպատակ։ Բոլորիս համար։ Դրանով վերջնարդյունքում պետք է կարգավորվի հակամարտությունը»,-լրագրողների հետ ճեպազրույցում այսօր անդրադառնալով ՀՀ վարչապետ Նիկոլ Փաշինյանի հայտարարությանը, թե ՀՀ-ն պատրաստ է Ադրբեջանի հետ բանակցել խաղաղության պայմանագրի շուրջ՝ ասաց Արցախի հանրապետության ԱԳ նախարար Դավիթ Բաբայանը։
«Այլ հարց է, որ Ադրբեջանն այլ պատկերացում ունի։ Ուզում է, որ մենք լքենք Արցախը, թողնենք Արցախը։ Նա չի թաքցնում այդ նպատակը։ Պետք է աշխատել խաղաղության պայմանագիրը կյանքի կոչելու ուղղությամբ, բայց ոչ թե Ադրբեջանի տեսակետից։ ՀՀ-ի այս ուղերձն Ադրբեջանն, այնուամենայնիվ, տորպեդահարելու է»,-համոզմունք հայտնեց Դավիթ Բաբայանը։
Հարցին ի պատասխան, թե արդյոք Ադրբեջանի հասարակությունը պատրա՞ստ է հաշտեցման, Դավիթ Բաբայանը նշեց․ «Մենք միշտ ասել ենք, որ պաշտոնական Ստեփանակերտի դիրքորոշումն է՝ հակամարտությունը կարող է կարգավորվել այն դեպքում, երբ հասարակությունների միջեւ համապարփակ հաշտեցում լինի։ Ադրբեջանի հանրությունը, դժբախտաբար, պատրաստ չէ հաշտեցման, բայց խնդիրը ժողովրդի մեջ չէ։ Լավ ու վատ ժողովուրդ չի լինում, բայց լինում է լավ ու վատ պետություն։ Ի դեմս Ադրբեջանի՝ ունենք երկիր, որտեղ նացիզմը պետական քաղաքականություն է»։
Կարդացեք նաև
Լուիզա ՍՈՒՔԻԱՍՅԱՆ
