2021 թվականը Հայաստանի տնտեսության համար բարդ է եղել այն առումով, որ նաեւ քաղաքական զարգացումները բարենպաստ չեն եղել եւ դրական հույսեր չեն առաջացրել. այս կարծիքին է Եվրասիական փորձագիտական ակումբի փորձագետ, տնտեսագիտության դոկտոր, պրոֆեսոր, «Այլընտրանք» հետազոտական կենտրոնի ղեկավար Թաթուլ Մանասերյանը:
Sputnik Արմենիա մուլտիմեդիոն կենտրոնում այսօր կայացած ասուլիսի ժամանակ, ներկայացնելով Եվրասիական փորձագիտական ակումբի ամենամյա՝ 7-րդ տնտեսական հետազոտությունը՝ Հայաստանի տնտեսական իրավիճակի մասին՝ ԵԱՏՄ-ին անդամակցության համատեքստում, Թաթուլ Մանասերյանն ասաց. «Ի պատիվ մասնավոր հատվածի ջանքերի, այնուամենայնիվ ճեղքում տեղի ունեցավ՝ 2020 թվականի անկման ֆոնին: Ուզում եմ շեշտել, որ անգամ անկման տարում, Հայաստանում առանձին ճյուղեր ունեցան ճեղքում, դեպի ԵԱՏՄ անդամ երկրներ: Սա աննախադեպ, բացառիկ երեւույթ է»:
2021-ի տնտեսական ակտիվության համար Թաթուլ Մանասերյանը կարեւորում է ներքին եւ արտաքին արգելքների անգամ մասամբ վերացումը՝ պայմանավորված կորոնավիրուսի համավարակով: Արտաքին արգելքների մասով՝ բանախոսն ընդգծում է, որ հաջողվել է ԵԱՏՄ շուկայում վերացնել 30 արգելք, որոնցից 15-ը պատնեշներ էին եւ վերաբերվում էին կազմակերպությունների կանոնների կիրառմանը: 2022-ին ևս 14 պատնեշ է նախատեսվում հանել, ինչը տնտեսագետը կարեւորում է՝ ԵԱՏՄ-ում տնտեսությունների ներդաշնակեցման համատեքստում եւ ինչը, մասնավորաբար, Հայաստանի փոքր շուկայի համար դրական նշանակություն է ունենալու: Խոսքը միասնական ֆինանսական, էլեկտրաէներգետիկ, գազային, նավթային շուկաների եւ միասնական թվային տարածքի ստեղծման հնարավորությունների ընդլայնմանն է վերաբերում: Արդյունքում, ըստ Թաթուլ Մանասերյանի, Հայաստանը, ի թիվս տնտեսության այլ ճյուղերի, հնարավորություն է ստանում նաեւ գիտատար ճյուղի զարգացման համար, որը մեզ համար բաղձալի ուղղություն է: Հայաստանը, նաեւ ըստ ԵԱՏՄ գործընկերների, հնարավորություն է ունենալու վերագտնել իրեն, իբրեւ ինդուստրիալ երկիր:
Մանրամասները՝ տեսանյութում
Կարդացեք նաև
Նելլի ԳՐԻԳՈՐՅԱՆ
