«Առավոտի» ունեցած տեղեկություններով՝ ՀՀ ոստիկանության ՔՈԳ վարչություն ահազանգ է ստացվել այն մասին, որ ՀՀ ԱՆ «Սևան», «Վարդաշեն» և «Դատապարտյալների հիվանդանոց» քրեակատարողական հիմնարկներում՝ ՀՀ գլխավոր դատախազության պատիժների և հարկադրանքի այլ միջոցների կիրառման օրինականության հսկողության վարչության կողմից իրականացված ստուգումների արդյունքներով՝ նշված քրեակատարողական հիմնարկներում պահվող անձանց համար սննդով ապահովելու նպատակով «Ռեդի Սթեդի» ՍՊ ընկերության և ՀՀ ԱՆ քրեակատարողական ծառայության միջև 2020-ի նոյեմբերի 17-ին կնքված պայմանագրի հիման վրա ընկերությունը հատկացված 1.357.800.000 ՀՀ դրամ գումարի դիմաց մատակարարել է սահմանված չափորոշիչներից էականորեն տարբերվող սնունդ:
Ըստ ահազանգի՝ նաև խախտումներ են գրանցվել «Քրեակատարողական բժշկության կենտրոն» ՊՈԱԿ-ի ստորաբաժանումներում, մասնավորապես հայտնաբերվել է քրեակատարողական հիմնարկներում պահվող, պետության իրավազորության ներքո գտնվող անձանց համար նախատեսված 476.000 դրամ արժողության դեղորայքի և բժշկական պարագաների անհամապատասխանություն՝ դրանց փաստացի առկայության և փաստաթղթային մնացորդների հետ: Այս առիթով ՀՀ ոստիկանությունը նյութեր է նախապատրաստում:
Տաթև ՀԱՐՈՒԹՅՈՒՆՅԱՆ
