ՀՀ քննչական կոմիտեի հրապարակած տվյալների համաձայն, 2021-ին զինվորական քննչական գլխավոր վարչությունում քննվել է 8369 քրեական գործ:
2020 թվականի համեմատ վարույթում քննված քրեական գործերի քանակն աճել է 3018-ով կամ 56.4 %-ով: Ավարտված քրեական գործերով, որպես մեղադրյալ ներգրավվել են 394 անձինք, ընդ որում՝ զինվորական հանցագործությունների մեջ մեղադրվողների կեսից ավելին՝ 199-ը, ժամկետային զինծառայողներ են։
«Մեդիա կենտրոնում» այսօր «Կարգապահությունը ԶՈՒ-ում՝ պատերազմից հետո. ինչո՞ւ են ավելացել զինվորական հանցագործությունները» թեմայով քննարկման ժամանակ, անդրադառնալով այս վիճակագրությանը, «Հելսինկյան ասոցիացիա» իրավապաշտպան ՀԿ-ի նախագահ Նինա Կարապետյանցն ասաց, որ իրականում թվային տվյալներով ներկայացնելը շատ հարմարավետ իրավիճակ է ստեղծում վարույթ իրականացնող մարմնի, դատախազության եւ մյուս պետական օղակների համար, քանի որ շատ հեշտ է խոսել մեծ թվերով: Իսկ թե այդ գործերն ինչո՞վ են ավարտվում, ի՞նչ արդյունքներ են լինում, դրա մասին խոսում են միայն իրավապաշտպանները, փաստաբանները, ովքեր զբաղվում են այդ գործերով:
Նինա Կարապետյանցը թեեւ հակված է պաշտոնական տվյալներին չհավատալ, բայց ներկայացված թվերն, ըստ նրա, վկայում են, թե կրկին ունենք մի իրավիճակ, երբ ամբողջ մեղքն ու պատասխանատվությունը բարդվում է 18 տարեկանների վրա: Այս ավանդույթը՝ պատերազմից սկսած ամբողջ բեռը, վերջացրած բանակում առկա իրավիճակի ամբողջ պատասխանատվությունը, դնել 18 տարեկան զինվորների վրա, թե բարոյական, թե պրոֆեսիոնալ առումներով նա նորմալ չի համարում: Իր գնահատմամբ, դա վկայում է հենց այդ համակարգի հիվանդ լինելու մասին:
Կարդացեք նաև
Իշխանությունն այժմ խոսում է բանակում բարեփոխումների մասին. իրավապաշտպանը ենթադրում է, որ դրանք իրականացվելու են մինչեւ այժմ իրականացված կամ չիրականացված բարեփոխումների նման, հետեւաբար՝ նա արդյունք չի ակնկալում: Նինա Կարապետյանցը որեւէ տեղաշարժ չի տեսնում ոչ 15 տարի առաջ եղած սպանությունների, ոչ վերջին սպանությունների գործերով եւ չի տեսնում, որ պետությունն իրականացրել է իր գործառույթը՝ հաստատելով արդարադատություն:
Այլ մանրամասները՝ քիչ ուշ
Նելլի ԳՐԻԳՈՐՅԱՆ
