«Հայաստան» դաշինքի պատգամավոր Գեղամ Նազարյանն այսօր առողջապահության նախարար Անահիտ Ավանեսյանից հետաքրքրվեց՝ ի վերջո պարզվե՞ց, թե դիմակը կորոնավիրուսի տարածման վրա ինչ ազդեցություն ունեցավ, ինչո՞ւ մեկուսացման ժամկետը 14 օրից դարձավ յոթ օր, որքա՞ն է մահերի թիվը, որովհետեւ 8-ից 9 հազար մահերի մասին են խոսում, եւ, ի վերջո, վստա՞հ են, թե ինչ են ներարկում քաղաքացիներին՝ պատվաստանյութի անվան տակ։
«Այո, դիմակները կրում են լուրջ կանխարգելիչ բնույթ, կարեւոր դեր ունեն վարակի տարածումը կանխելու համար։ Արդյունավետության մասով մենք ականատես ենք եղել ԲԿ-ներում մոնիթորինգների արդյունքներն ամփոփելիս եւ այլ տվյալներով»,-պատասխանեց Անահիտ Ավանեսյանը։
Նրա խոսքով՝ վիրուսի դեմ պայքարի ՀՀ-ի քաղաքականությունը եղել է ճկուն, հիմնվել ապացուցողական հիմքեր ունեցող նյութերի վրա․ «Առաջիններից էինք, որ հրաժարվեցինք երկարատեւ լոկդաուններից, որովհետեւ հասկացանք՝ կորոնավիրուսը մեր հետ է երկար ժամանակով»։
Ինչ վերաբերում է պատվաստանյութերին, նախարարը վստահեցրեց, որ ներմուծվում են միայն ԱՀԿ-ի հաստատած եւ տվյալ երկրում հաստատում ստացած պատվաստանյութերը․ «Այսինքն, բոլոր պատվաստանյութերն անցել են երեք աստիճանի փորձաքննություն։ Հաստատվել է դրանց արդյունավետությունը։ ՀՀ-ում առկա բոլոր պատվաստանյութերը համապատասխանում են չափանիշներին։ Ինչ վերաբերում է մեկուսացման ժամկետին, ապա այս պահին առկա հիմքերը հուշում են, որ պատվաստված քաղաքացիները յոթ օր անց այլեւս վտանգ չեն ներկայացնում։ Այդ կարգավորումը միայն պատվաստվածներին է վերաբերում, եթե քաղաքացին հանձնում է թեստ, եւ պատասխանը բացասական է»։
Կարդացեք նաև
Question and answer session between the members of the Government and NA deputies took place at the RA National Assembly
Գեղամ Նազարյանը նաեւ հարցրեց՝ ի՞նչ նպատակ էր հետապնդում 2020թ․-ի մարտին մարզահամերգային համալիրում մահճակալներով հայտնի լուսանկարի ակտիվ տարածումը։ Անահիտ Ավանեսյանը հարցին չանդրադարձավ։
Լուիզա ՍՈՒՔԻԱՍՅԱՆ
