Դեպի Հայաստանի սահման երկաթուղու շինարարությունն Ադրբեջանը կավարտի 2023թ., այժմ աշխատանքներն արված են 24 տոկոսով: Այս մասին հայտարարել է Ադրբեջանի արտգործնախարար Ջեյհուն Բայրամովը:
«Մինչև Հայաստանի սահման 110 կմ երկարությամբ երկաթուղու շինարարությունը սկսվել է 2021թ.: Այս պահին նախագիծն իրականացված է 24 տոկոսով: Շինարարությունը կավարտվի 2023թ.»,- ասել է Բայրամովն այսօր հրավիրված մամուլի ասուլիսում:
Նա նաև ասել է, որ Հայաստանի հետ «տրանսպորտային միջանցքի» վերականգման շրջանակում աշխատանքներ են տարվում նաև ավտոճանապարհի շինարարության ուղղությամբ, որը կունենա 124 կմ երկարություն: Այդ նախագծով աշխատանքները կատարված են 27 տոկոսով:
«Այս բոլոր գործողությունները Ադրբեջանի կողմից ստանձնած պարտավորությունների կատարումն է: Բայց, ցավոք, մեր տեղեկություններով, հայկական կողմն այդ ուղղությամբ հակասական հայտարարություններից բացի՝ որևէ այլ աշխատանք չի իրականացնում: Դա բացահայտ ցույց է տալիս երկու երկրների վերաբերմունքն այդ հարցի նկատմամբ, և թե որքան լուրջ է կողմերից յուրաքանչյուրը վերաբերվում իր պարտավորություններին»,- ասել է Բայրամովը:
Կարդացեք նաև
Նա նաև հերթական անգամ նշել է, որ պաշտոնական Բաքուն պատրաստ է սահմանազատման հարցերով հանձնաժողովի ձևավորմանը: «Չնայած դրան՝ հայկական կողմը որոշ նախապայմաններ է առաջ քաշում: Կարծում ենք, որ այդպիսի վերաբերմունքը չի նպաստում դրական դինամիկայի ձևավորմանը»,- ասել է նա:
Պատրաստեց Վիկտորյա ԱՆԴՐԵԱՍՅԱՆԸ
