«Գործընկեր պետությունն առնվազն նման հայտարարություններ չպետք է անի։ Միջազգային պրակտիկայում դա սկանդալային դրվագներից մեկը կարող է համարվել»,-խորհրդարանում լրագրողների հետ ճեպազրույցում այսօր ասաց «Հայաստան» դաշինքի պատգամավոր Արմեն Ռուստամյանը։
Հիշեցնենք, որ Բելառուսի նախագահ Ալեքսանդր Լուկաշենկոն Վլադիմիր Սոլովյովին տված հարցազրույցում ասել էր, թե Բելառուսի և Ռուսաստանի միութենական պետությանը կարող են միանալ հետխորհրդային տարածության նաև այլ հանրապետություններ, և մեծ հավանականությամբ՝ Հայաստանը, որովհետև «ոչ մեկին պետք չէ»:
Արմեն Ռուստամյանի խոսքով՝ նման արտահայտությունների պատճառները պետք է մեր մեջ փնտրել․ «Մենք ենք տեղ տալիս, որ այդպես քամահրանքով խոսեն։ Բայց մենակ Լուկաշենկոն չի։ Մեր հարեւան երկրի նախագահն օրը մեջ, երբ առիթ է լինում, խոսում է այդ ոճով, նվաստացնում, վիրավորում քո պետությունն ու նրա ղեկավարին։ Նսեմացած վիճակի արդյունքն ենք տեսնում։ Երբ ասում էինք, որ ՀՀ-ն կորցրել է իր սուբյեկտայնությունը եւ ինքն իրեն պաշտպանելու հնարավորություն չունի, հեղինակություն չունի, իրականությունն էինք ասում։ Նման հայտարարությունները դրա հետեւանքն են»։
Կարդացեք նաև
Ըստ պատգամավորի՝ Լուկաշենկոյի ասածը խոսում է ներքին լուրջ խնդիրների մասին, այն մասին, թե կուլիսներում ինչ է տեղի ունենում․ «Դիվանագիտությունը բազմաշերտ է։ Եթե ուզում ես հաջողել, քո դիվանագիտական կորպուսին պետք է հարգես։ Եթե ՀՀ ղեկավարը դիվանագիտական կորպուսին վիրավորում է եւ բացահայտ խոսում, որ պետք է յուրայիններին դեսպան նշանակի, սա նշանակում է, որ քանդում է դիվանագիտական մեծ հարթակը, որն ուներ ՀՀ-ն եւ վայելում էր հեղինակություն»։
Լուիզա ՍՈՒՔԻԱՍՅԱՆ
