Արդարադատության նորանշանակ փոխնախարար Գրիգոր Մինասյանն այսօր խորհրդարանում լրագրողների հետ զրույցում գնահատականներ չհնչեցրեց վարչապետ Նիկոլ Փաշինյանի՝ նախկինում արտաբերած «նախկինները օտարերկրացիների կոշիկ լիզողներ են», «վնգստացող դատավորներ», «ծեփել պատերին» եւ նմանօրինակ արտահայտությունների վերաբերյալ։
«Կան քաղաքական հայտարարություններ։ Առաջնորդվենք այն սկզբունքով, որ լինելով ՀՀ քաղաքացի՝ ուզում ենք ունենալ լավ դատաիրավական համակարգ։ Ունենք դատաիրավական բարեփոխումների ռազմավարություն, որում առկա են քաղաքացիների մտահոգությունները»,-հարցադրումներին այսպես արձագանքեց նա։
Լրագրողները հիշեցրին, որ Նիկոլ Փաշինյանը քննադատում էր նաեւ խնամի-ծանոթ-բարեկամ սկզբունքով պաշտոնների նշանակումները, մինչդեռ Մինասյանը, լինելով արդարադատության նախարարի ընկերը, նշանակվել է պաշտոնի։ «Իմ պաշտոնը քաղաքական է։ Օրենքը թույլ է տալիս նշանակում անել նրան, ով կիսում է քո գաղափարները եւ ունի փորձ։ Իսկ ձեր ասած խնամի-ծանոթ-բարեկամ երեւույթը շատ ցավոտ էր նախկինում։ Այսօր էլ եթե նման դեպքեր կան, պետք է բացառվեն։ Քաղաքացիական պաշտոններում, որոնք մրցութային են, անցկացնում էին ծանոթներին»,-պատասխանեց Գրիգոր Մինասյանը։
Կարդացեք նաև
Ինչ վերաբերում է Freedom House միջազգային կազմակերպության հայտարարությանը, որով վերջինս խորապես մտահոգված է ՀՀ քրեական օրենսգրքի՝ ծանր վիրավորանքը քրեականացնող նոր դրույթի կիրառման կապակցությամբ ՀՀ քաղաքացու նկատմամբ կայացված առաջին դատավճռով, Գրիգոր Մինասյանն ասաց․ «Քանի որ մեր երկրում կար իրավունքի չարաշահում, դրա համար նպատակահարմար է եղել նման օրենսդրական փոփոխություն անել։ Գործընկերների բոլոր մտահոգությունները լսելի են։ Ապագայում եթե փոփոխություններ լինեն, կիմանանք, բայց հաշվի առնենք, որ կա խնդիրը, որը պետք է լուծվեր։ Այժմ սա է լուծումը, որ նման դրսեւորումներ մեր երկրում չլինեն»։
Լուիզա ՍՈՒՔԻԱՍՅԱՆ
