Վերաքննիչ քրեական դատարանի դատավոր Ռուբիկ Մխիթարյանի որոշմամբ՝ Քաջարանի համայնքի ղեկավար Մանվել Փարամազյանի նկատմամբ 2021թ-ի դեկտեմբերի 17-ի Սյունիքի մարզի ընդհանուր իրավասության դատարանի դատավոր Բորիս Բախշիյանի կայացրած որոշումը բեկանվեց ու Փարամազյանը կկալանավորվի։ Բախշիյանի որոշմամբ Մանվել Փարամազյանի կալանքը փոխվել էր 70 մլն դրամով։
Քաջարանի համայնքի ղեկավար Մանվել Փարամազյանը կալանավորվել է հուլիսի 10-ին։ Նրան մեղադրանք է առաջադրվել ՀՀ քրեական օրենսգրքի 38-178-րդ հոդվածի (խարդախության օժանդակելը կամ կազմակերպելը), 311-րդ հոդվածի (կաշառք ստանալը) եւ 154.2-րդ հոդվածի (ընտրողներին կաշառք տալը, կաշառք ստանալը, ընտրությունների ժամանակ բարեգործության արգելքի խախտումը կամ ընտրողի ազատ կամքի իրականացմանը խոչընդոտելը) հատկանիշներով։
«Աստծո դատաստանից վախեցեք։ Ո՞ւր եք փախչելու»,-որոշումը հրապարակելուց հետո դատավորին ասացին Մանվել Փարամազյանի համակիրները։
Կարդացեք նաև
Մանվել Փարամազյանի նկատմամբ Վերաքննիչ դատարանի կայացրած որոշումը կբողոքարկվի Վճռաբեկ դատարան։
Նշենք, որ Սյունիքի մարզի ընդհանուր իրավասության դատարանի դատավոր Բորիս Բախշիյանի լիազորությունները Բարձրագույն դատական խորհրդի որոշմամբ կասեցվել են։ Նրա նկատմամբ հարուցվել է քրեական գործ։ Երեւանի ընդհանուր իրավասության դատարանում՝ դատավոր Բորիս Բախշիյանին կալանավորելու միջնորդության քննությունն ավարտվել է եւ այսօր ժամը 11-ին կհրապարակվի որոշումը։
Արմեն ԴԱՎԹՅԱՆ
