Aravot.am-ի տեղեկություններով, փետրվարի 2-ին զեկուցագիր է ներկայացվել, որ ՀՀ ԱԱԾ Լոռու մարզային վարչության Վանաձորի բաժնում նախապատրաստված նյութերով ձեռք են բերվել փաստական տվյալներ, որ Վանաձորի քաղաքապետարանի ենթակայությամբ գործող «Վանաձորի սպասարկում» ՀՈԱԿ-ի տնօրեն Է. Գրիգորյանը տեղական ինքնակառավարման մարմնի կազմակերպությունում մշտապես իրականացնելով կազմակերպչական-տնօրինչական, վարչատնտեսական գործառույթներ, այն է՝ Վանաձորի քաղաքապետի հետ կնքված աշխատանքային պայմանագրի համաձայն՝ ի թիվս այլոց, լիազորվել է ՀՀ օրենսդրությանը համապատասխան ղեկավարել կազմակերպության ֆինանսատնտեսական գործունեությունը:
Վերջինս նույն ՀՈԱԿ-ի աշխատակիցներ Մ. Մ.-ի, Տ. Մ.-ի, ինչպես նաեւ իր դստեր ամուսնու՝ Է. Հ.-ի օժանդակությամբ գերեզմանատանը հուղարկավորվող անձանց հարազատների օգտին գործողություններ կատարելու, այն է՝ գերեզմանատանը նրանց նախընտրած վայրերում բարեկարգված եւ մաքրված տարածքներ տրամադրելու, հուղարկավորության ծառայություններ մատուցելու համար մեկ միասնական դիտավորությամբ 2021 թվականի հոկտեմբերի 10-ից մինչեւ դեկտեմբերի 11-ն ընկած ժամանակահատվածում 21 անձանցից պահանջել եւ ՀՀ դրամով ու ԱՄՆ դոլարով ստացել է առանձնապես խոշոր չափերով՝ ընդհանուր 5.747.796 դրամ կաշառք:
Քննությունը վարում է ՀՀ ԱԱԾ քննչական վարչությունը:
Տաթեւիկ ՂԱԶԱՐՅԱՆ
