Հեռուստատեսության և ռադիոյի ազգային հանձնաժողովի նախագահ Տիգրան Հակոբյանի ֆեյսբուքյան գրառումը
Շուտով Ազգային ժողովը կընտրի Հեռուստատեսության եւ ռադիոյի հանձնաժողովի 7-րդ անդամին: Մի շարք լրատվամիջոցներ համոզում են հասարակությանը, որ, ըստ այսպես կոչված Դ՛Օնտի բանաձեւի, այդ վերջին անդամը պետք է պարտադիր ընտրվի ընդդիմադիր ֆրակցիաների կողմից առաջադրված թեկնածուներից:
Դա այդպես չէ: Դ՛Օնտի հայտնի բանաձեւի նպատակն է խորհրդարանի ղեկավար կազմում ամրագրել ԱԺ ընտրությունների արդյունքներով մանդատներ ստացած քաղաքական ուժերի հարաբերակցությունը: Այլ մարմինների (ՍԴ, ԿԸՀ, ՀՌՀ, այլ) ձեւավորման պարագայում օրենսդրությունը չի նախատեսում այդ բանաձեւի կիրառումը:
Ավելին, կիրառումը անտրամաբանական կլիներ եւ կարժեզրկեր մեր Հանձնաժողովի գործունեության ամբողջ իմաստն ու էությունը, քանի որ ՀՌՀ անդամները կուսակցական չպետք է լինեն, քաղաքականությամբ չպետք է զբաղվեն, այս կամ այն կուսակցության շահերից բխող որոշումներ չպետք է կայացնեն…
Կարդացեք նաև
Ուրեմն, Հանձնաժողովի անդամ լինելու պայմանը քաղաքական ուժերի ներկայացվածության ապահովումը չի ՀՌՀ-ում: Այլ հատկանիշներ են անհրաժեշտ կամ հակացուցված թեկնածուներին: Հակացուցվածներից են՛ չարությունը, ատելությունը այլ հայացքներ ունեցող անձի կամ ուժի նկատմամբ, լայնախոհության, ինքնուրույն որոշումներ կայացնելու կամքի բացակայությունը, դեստրուկտիվ վարմունքը….
Ուստի խնդրանքս լրատվամիջոցներին. ՀՌՀ անդամի առաջադրման եւ ընտրության թեմայով խոսելիս՝ Դ՛Օնտի բանաձեւը մի հիշատակեք:
