«Քաղաքական ցինիզմի դասական, դասագրքային օրինակ է»,- «Հայաստան» խմբակցության պատգամավոր Ագնեսա Խամոյանն այսօր լրագրողների հետ զրույցում այսպես արձագանքեց ՔՊ խմբակցության ղեկավար Հայկ Կոնջորյանի առաջարկին, որ ընդդիմությունը կողմ քվեարկի նախագահի պաշտոնում իրենց առաջադրած թեկնածուին:
Հիշեցնենք, որ ընդդիմադիր խմբակցությունները միասնական հայտարարություն են տարածել, որ չեն մասնակցելու նախագահի ընտրությանը:
Ագնեսա Խամոյանի խոսքով՝ «Ընդդիմությունն, իհարկե, չի կարող ձայն տալ Նիկոլ Փաշինյանի կամակատար նախագահի թեկնածուին». «Նա երկրորդ փուլով լինելու է ՀՀ նախագահ, արդեն իսկ խոստովանել է, որ լինելու է Նիկոլ Փաշինյանի որոշումները դակող նախագահ: Ինչպես Նիկոլ Փաշինյանն էր ասել իր վերջին հարցազրույցի ժամանակ, կառավարության վերջին նիստի ժամանակ, ինքը ապահովում է իր իշխանական բուրգի ներդաշնակեցումը: Հաշվի առնելով, որ երկրորդ փուլով ընդամենը 65 ձայնով կարողանալու են նախագահ կարգել Վահագն Խաչատուրյանին, իրեն դա հաջողելու է: Հաջողելու է ապահովել իր իշխանական բուրգի անխափան աշխատանքը: Խոսելով նախագահի հավանական թեկնածուի չափանիշերի, չափորոշիչների մասին՝ որեւէ բառ չէր արտաբերում պետության շահի մասին եւ բաց տեքստով խոսում էր իր իշխանության անխափան գործունեության մասին»:
Կարդացեք նաև
Հարցին՝ պարզվում է՝ Վահագն Խաչատուրյանը նոր է դադարեցրել ՀԱԿ-ին իր անդամակցությունը, այսինքն, ստացվում է՝ կուսակցական գործչի են առաջադրել, սա խախտո՞ւմ է՝ Ագնեսա Խամոյանն ասաց. «Բազմաթիվ խախտումներ են այս ընթացքում արձանագրվել: Նույն Վահագն Խաչատուրյանը հայտարարում էր, որ վաղուց դադարեցրել է իր անդամակցումը, հետո ՀԱԿ-ը հրապարակեց իր դիմումը, փաստորեն, երեկ էր ստացել: Դրանով Լեւոն Տեր-Պետրոսյանը եւս մեկ անգամ հիշեցրեց, ակնարկեց իր բնորոշումը Վահագն Խաչատուրյանի մասին, ով խոսելով իր, Ջհանգիրյանի եւ մյուսների կողմից իր թիմը լքելու քայլի մասին՝ այն որակել էր ընդամենը առնետավազք»:
Հռիփսիմե ՋԵԲԵՋՅԱՆ
