Քաղաքական վերլուծությունների «Ակունք» կենտրոնի տնօրեն Ռուբիկ Հակոբյանը «Հայելի» ակումբում կարճ անդրադարձավ ԱԺ գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողվում իր մասնակցությամբ միջադեպին, որտեղ նա գտնվում էր որպես ՀՀ ԱԺ «Հայաստան» եւ «Պատիվ ունեմ» խմբակցությունների կողմից ՀՌՀ անդամի առաջադրված թեկնածու: «Ես գիտեի, թե ուր եմ գնում, գիտեի, որ այնտեղ բացառվում է ընտրություն: Իմ մոտ խնդիր կար ձեւակերպված, որ իրենք երեսպաշտությամբ են զբաղվում: Գնացի՝ ապացուցեմ, որ իրենց լիդերը, ինչպեսեւ իրենք, իրենց խոսքի տերը չեն, որ իրենց լիդերը այսօր, թերեւս, դարձել է իր ոխերիմ թշնամին: Այսինքն, ընդդիմադիր Նիկոլ Փաշինյանի ոխերիմ թշնամին այսօրվա վարչապետ Նիկոլ Փաշինյանն է: Նույնպես եւ իրենք»,-ասաց Ռուբիկ Հակոբյանը:
Նրա խոսքով, հանձնաժողովում, ըստ էության, մասնագիտական քննարկում չի եղել: Դրա փոխարեն եղել են զրպարտանքներ, վիրավորանքներ, բացառիկ երեսպաշտություն եւ արդյունքում՝ սադրանք, որին, մտերիմներն ասում են, չպետք է ենթարկվեր: «Գուցե ճիշտ են ասում: Բայց այդուհանդերձ, ստացան պատասխանը եւ, կարծում եմ, միշտ պետք է ստանան»,-ասաց Ռուբիկ Հակոբյանը:
Աշոտ ՀԱԿՈԲՅԱՆ
