2022 թվականին հունվարի 31-ին ԱՀ բնապահպանության կոմիտեից ԱՀ ներքին գործերի նախարարության ոստիկանություն է ներկայացվել ապօրինի անտառահատման դեպքերի վերաբերյալ արձանագրություններ, որոնց համաձայն «Արցախանտառ» պետական ոչ առևտրային կազմակերպության «Մարտակերտի մասնաճյուղի Վաղուհասի անտառպետության» թիվ 1 պահաբաժնի «Կիրիներին ձոր» կոչվող տեղանքում ապօրինի հատվել է 14 հատ ծառ, նույն պահաբաժնի 22-րդ հատատեղում՝ 11 հատ ծառ, «Պերեվալեն տակ» կոչվող տեղանքում՝ 9 հատ ծառ, նույն պահաբաժնի 60-րդ հատատեղում՝ 7 հատ ծառ, «Ռուսեն աղբյուր» կոչվող տեղանքում՝ 41 հատ ծառ, որի հետևանքով պետությանը հասցվել է ընդհանուր 2.729.000 դրամ գումարի գույքային վնաս: Հայտնում է ԱՀ դատախազությունը։
Ներկայացված դեպքերի առնչությամբ ԱՀ ներքին գործերի նախարարության ոստիկանության կողմից նախապատրաստվում են նյութեր քրեական գործ հարուցելու համար:
Մինչդատական քրեական վարույթի օրինականության նկատմամբ դատախազական հսկողությունն իրականացնում է ԱՀ Մարտակերտի և Շահումյանի շրջանների դատախազությունը:
ԱՀ դատախազությունը հարկ է համարում հերթական անգամ հայտարարել, որ արցախյան բնության, մեզ շրջապատող միջավայրի նկատմամբ հոգատար և պատասխանատու վերաբերմունքը մեզանից յուրաքանչյուրի բարոյական պարտքն ու պարտականություն է, որի խախտման յուրաքանչյուր դեպք պետք է արժանանա բարոյական պարսավանքի և իրավական արձագանքի:
Կարդացեք նաև
ԱՀ դատախազություն
