ԱՊՊԱ-ի թանկացման մեղավորը Կենտրոնական բանկն է, որը ամենաթողություն է տվել ապահովագրական բյուրոյին: Այսօր ասաց երթեւեկության փորձագետ, փաստաբան Արտակ Խաչատուրովը, որը մի քանի տասնյակ այլ վարորդ-քաղաքացիների հետ մասնակցում էր ընդդեմ ԱՊՊԱ-ի թանկացման բողոքի ցույցին:
Արտակ Խաչատուրով
Բանն այն է, որ Ավոտապահովագրողների բյուրոյի խորհուրդը 2021 թվականի դեկտեմբերի 23-ի նիստում որոշում է ընդունել, ապա ՀՀ կենտրոնական բանկն էլ այս տարվա հունվարի 25-ին, այսպես ասած՝ հաստատել է ԱՊՊԱ-ի՝ պարտադիր ապահովագրության վճարի ավելացումը։
Սա հարուցել է բազմաթիվ վարորդների դժգոհությունը: Նրանք արդեն երկրորդ անգամ են ցույց անում: Ասում են՝ առաջին հայացքից թվում է դրական փոփոխություններ պետք է լինեն, եւ ԱՊՊԱ-ն ընդամենը 3 հազար դրամով է ավելանում, սակայն բյուրոյի որոշման որոշ դրույթներ համարում են վտանգավոր, անընդունելի։
«Եթե որոշումը չփոխեն, թույլ չենք տալու տուն գնան: Փշալարերը քաշելու ենք, ասելու ենք՝ դե դուք մնացեք էն կողմը, մենք՝ էս կողմը՝ մինչեւ խելքներդ հավաքեք գլուխներդ»,-ասաց Արտակ Խաչատուրովը՝ նշելով, որ իրականում ապահովագրականները մեղք չունեն, քանի որ Կենտրոնական բանկը ավելորդ վճարումներով ծանրաբեռնել է ապահովագրական ընկերություններին, նրանք էլ ստիպված բարձրացնում են գները, որ «տակից դուրս գան»:
Կարդացեք նաև
Այդ պատճառով էլ, ըստ Արտակ Խաչատուրովի, իրենց բողոքն ուղղված է հենց ԿԲ-ին: Առաջարկում են որոշումը հետաձգել՝ մինչեւ որ հանրային քննարկումներ իրականացվեն եւ ըստ արձագանքի՝ որոշում կայացնեն: Ցույցի մասնակիցների խոսքով, համատարած թանկացումների ֆոնին նաեւ ԱՊՊԱ-ն են թանկացնում:
Նրանք «ԱՊՊԱ-ն չի՛ թանկանալու» մակագրությամբ թերթիկներ էին պատրաստել՝ տարբեր տեղեր փակցնելու ակնկալիքով, սակայն, ոստիկանները հորդորեցին դրանք չփակցնել հանրային վայրերում: Նրանց օրինական պահանջին չենթարկվելու համար բերման ենթարկվեց Արտակ Խաչատուրովը:
Վարորդների ցույցը հսկում էին մի քանի տասնյակ ոստիկաններ, որոնք մի քանի շարքով պատ էին կազմել ԿԲ-ի դիմաց:
Վարորդների խոսքով, տեղի ունեցածը ներկայացնում են բարեփոխում եւ որ ընդամենը 3 հազար դրամով է թանկացումը, բայց իրականում ծուղակ է, քանի որ ընթացիկ խնդիրներ կան. «Հեռավոր գյուղից մի պապիկ եկել է Երեւան, վթար է ունեցել, կամ հենց իրենց գյուղում է ունեցել: Զանգում են, ասում են՝ ներբեռնեք հավելվածը, գրանցեք պատահարը, արտաքին տեսքի վնասվածքները: Բայց ներքին զննություն չեն անում, չեն մոտենում իրենց մասնագետները: Սա մեկ խաբեություն: Կամ այդ պապիկն է՝ մի հատ սովորական «նոկիա» ունի ու չի կարողանում հավելվածը ներբեռնի, ի՞նչ է ստացվում, ստացվում է, որ այդ մարդը դուրս մնա՞ց այդ օրենքից, բայց նա վճարում է չէ՞ այդ ԱՊՊԱ-ի համար»:
Վարորդների ներկայացմամբ, ոլորտում բազմաթիվ բացթողումներ կան, ԱՊՊԱ-ից հեռախոսազանգերին երբեմն չեն պատասխանում, կամ՝ ասում են՝ վթար է եղել, 5 րոպե ուշ եք զանգել եւ այլն:
Վարորդները ավտոմեքենաների ազդանշանները միացրած՝ երթով շարժվեցին դեպի ԱՊՊԱ բյուրո: Ասացին՝ այնքան են պայքարելու՝ մինչեւ որ հետ կանգնեն այդ որոշումից:
Լուսինե ԲՈՒԴԱՂՅԱՆ
