«Չեմ ուզում ասել մի բան, որի մասին հստակ տեղեկություն չունեմ»,-խորհրդարանում լրագրողների հետ զրույցում այսօր անդրադառնալով հարցին, թե երբ է տեղի ունենալու բանակի երեսունամյակի հետաձգված տոնակատարությունը՝ ասաց ՀՀ պաշտպանության փոխնախարար Արման Սարգսյանը։
Թե ինչու միջոցառումներ տեղի չունեցան, փոխնախարարը որպես պատճառ մատնանշեց կորոնավիրուսային հիվանդությամբ վարակման բարձր թվերը։
Հատկանշական է, որ սովորության համաձայն՝ Արման Սարգսյանը շտապում էր հեռանալ եւ քայլելու ընթացքում էր պատասխանում հարցերին, շեշտում, որ լրագրողներն իրար շատ մոտ են կանգնած, հեսա մեկի թեստը դրական կլինի, մինչդեռ պաշտպանության եւ անվտանգության հարցերի հանձնաժողովում տեղի ունեցած քննարկման ժամանակ նստած էր պատգամավորներից նույն հեռավորության վրա․ բոլորն առանց դիմակների։
Կարդացեք նաև
«Գիտեմ, որ ժամանակավոր հետաձգվել է։ Պատճառն օբյեկտիվ է։ Թվերն ամեն օր շատանում են, բանակում էլ կա խնդիրը»,-հավելեց նա։
Ինչ վերաբերում է գնահատականներին, թե բանակի օրը միտումնավոր պատշաճ չի նշվել, Արման Սարգսյանն ասաց․ «Նման բան չի կարելի ասել։ Նախապատրաստվել էինք, հրավիրատոմսեր էին ուղարկվել, միջոցառումներ էին նախատեսվել, որոնք կասեցվեցին ուղղակի»։
Իսկ թե ինչու նախարար Սուրեն Պապիկյանը ուղերձ չի հղել, փոխնախարարը խնդրեց հարցադրումն ուղղել ճիշտ հասցեատիրոջը։
Լուիզա ՍՈՒՔԻԱՍՅԱՆ
