Այսօր ԱԳ նախարար Արարատ Միրզոյանը պատասխանել է լրագրողների մի քանի հարցերի:
– Հայ-թուրքական հարաբերությունների կարգավորումը կզսպի՞ Ադրբեջանին հայ-ադրբեջանական սահմանին պարբերաբար ագրեսիա չիրականացնելու հարցում:
– «Ընդհանրապես չլուծված խնդիրների լուծումը, հարաբերությունների կարգավորումը դրական ազդեցություն կթողնի ողջ տարածաշրջանի վրա, բոլոր զուգահեռ ընթացող գործընթացների վրա, որքան էլ արժե երբեմն երեւույթներն առանձին դիտարկել, բայց, իհարկե փոխկապակցվածություն կարող է լինել:
– Ե՞րբ է հայկական կողմը Անթալիայի հրավերը ընդունելու հետ կապված որոշումն ընդունելու։
Կարդացեք նաև
– Չգիտեմ, անկեղծ ասած: Հայկական կողմին վերջնաժամկետ չի փոխանցվել, փոխանցվել է միայն հրավերը, բնականաբար, այնպես կանենք, որ ողջամիտ ժամկետներում տեղեկացնենք հրավիրող կողմին:
Հիշեցնենք, որ Թուրքիայի ԱԳ նախարարը հայտարարել է. որ Թուրքիան Հայաստանին հրավիրել է մասնակցելու Անթալիայի դիվանագիտական ֆորումին:
-Հայաստանն առաջարկներ էր ներկայացրել Ադրբեջանին, բայց, կարծես թե, այս մասով դրական ազդակներ չեն գալիս: Այսինքն՝ սահմազատում, սահմանագծում տեղի չի՞ ունենալու։
-«Եթե կհիշեք, Հայաստանի վարչապետը, Ադրբեջանի ու Ռուսաստանի նախագահները Սոչիում պայմանավորվել են, որ կողմերը քայլեր կձեռնարկեն տարածաշրջանում անվտանգության ու կայունության մակարդակի բարձրացման ուղղությամբ ու գործը կտանեն սահմանազատման հանձնաժողովի ստեղծմանը: Մենք 100 տոկոսով հավատարիմ ենք այս պարտավորությանը, որ ստանձնել ենք: Այժմ ադրբեջանական ու ռուսական կողմի հետ քննարկում ենք այն անվտանգության միջոցները, որոնք սահմանագծին կստեղծեն կայունության ու անվտանգության մեխանիզմներ, տարբեր առաջարկներ ենք ներկայացրել, Բաքվից բացասական արձագանք է եղել, բայց սա շարունակական գործընթաց է, եղել են նաեւ մեզ համար անընդունելի առաջարկներ… Բազմիցս հայտարարել ենք, որ հետաքրքրված ու շահագրգռված ենք այդ գործընթացով:
– Դուք նշեցիք, որ Ադրբեջանը փորձում է սահմանափակել «Կարմիր խաչի » Արցախ այցերը, հայկական կողմն ի՞նչ քայլեր է ձեռնարկում դրա դեմ:
– Մենք շատ ինտենսիվ քննարկումների մեջ ենք թե՛ «Կարմիր խաչի », թե՛ մյուս միջազգային կազմակերպությունների հետ:
Արփինե ՍԻՄՈՆՅԱՆ
