«Դինամո» մարզադահլիճում մեկնարկել է բռնցքամարտի Հայաստանի երիտասարդական առաջնությունը: Մեկնարկային օրվա ավարտին հավաքականի ավագ մարզիչ Վազգեն Բադալյանը տպավորություններով կիսվեց Aravot.am-ի հետ:
«Մասնակցում է 141 բռնցքամարտիկ, որից ինը՝ աղջիկ: Առաջին օրվա մենամարտերը դիտելով՝ դժգոհ չեմ: Հաճելի է, որ առաջին օրվանից սկսած ռինգում լավ մրցակցություն է ծավալվում:
Մասնակիցների մեջ կան տղաներ, որոնք արդեն հասցրել են իրենց տարիքային խմբի միջազգային տարբեր ռինգերում բավականին բարձր արդյունքներ գրանցել: Մասնավորապես, անցած տարվա Եվրոպայի երիտասարդական առաջնությունում, որտեղ Հայաստանի հավաքականը 2 ոսկե, 2 արծաթե, 1 բրոնզե մեդալով պատմության մեջ, անգամ խորհրդային տարիներին, չեղած արդյունք գրանցեց՝ նվաճելով թիմային 3-րդ տեղը:
Վստահ եմ, մենամարտերը գնալով կթեժանան եւ կկարողանանք լավ հավաքական ձեւավորել, ինչը շատ եմ կարեւորում, քանի որ մտադիր ենք այս տարի էլ առնվազն կրկնել անցած մրցաշրջանի արդյունքը: Դա, անշուշտ, հեշտ չէ, բայց ամեն բան մեծապես կախված կլինի նաեւ նախապատրաստության որակից ու արդյունավետությունից:
Կարդացեք նաև
Ես իմ նպատակը համարում եմ ոչ միայն երիտասարդների հետ բարձր արդյունքների հասնելը, այլ ազգային հավաքականին լավագույն կադրեր մատակարարելը: Ի վերջ, ազգային հավաքականն է երկրի գլխավոր թիմը: Այս առումով, հաճելի է, որ մեր թիմի երկու բռնցքամարտիկներ օրերս նվաճեցին Հայաստանի մեծահասակների չեմպիոնի կոչումը»,-ասաց ավագ մարզիչը:
Աշոտ ՀԱԿՈԲՅԱՆ
