«Նիկոլ Փաշինյանի ոչ մի նախաձեռնություն ողջամիտ չեմ համարում։ Խոսում է բաներից, որոնց մասին պատկերացում չունի։ Իրեն թվում է, թե այդ պայմանագիրը պատրաստ է, ստորագրությունը դնելու են եւ բացեն խաղաղության դարաշրջան։ Այդպես չի։ Նրա նախաձեռնած ոչ մի բան ողջամիտ չի»,-«Հայելի» մամուլի ակումբում լրագրողների հետ հանդիպմանն այսօր անդրադառնալով վարչապետ Նիկոլ Փաշինյանի հայտարարությանը, թե պատրաստ է խաղաղության պայմանագրի շուրջ բանակցություններ սկսել Ադրբեջանի հետ՝ ասաց ադրբեջանագետ Արմինե Ադիբեկյանը։
Նրա խոսքով՝ Ադրբեջանն էլ է պատրաստ պայմանագիր կնքի, բայց՝ իր պայմաններով․ «Այդպես էլ չհասկացանք՝ Փաշինյանն այդ պայմաններն ընդունո՞ւմ է, թե ոչ։ Ադրբեջանն ասում է, որ պետք է ճանաչել իր տարածքային ամբողջականությունը եւ Արցախն իր կազմում»։
Ինչ վերաբերում է Փաշինյանի պնդմանը, թե ՀՀ-ն ու Ադրբեջանը դեռեւս 1992թ․-ին են ճանաչել միմյանց տարածքային ամբողջականությունը, Արմինե Ադիբեկյանը նշեց․ «Սերժ Սարգսյանը մանրամասն խոսել է այդ մասին, չկրկնվեմ»։
Լուիզա ՍՈՒՔԻԱՍՅԱՆ
