Փաստերի ստուգման հարթակը հրապարակել է, որ դուք հայտարարագրման ենթակա գույք եք թաքցրել, նախկինում էլ նման միջադեպ եղել է եւ դուք նախազգուշացում եք ստացել, հիմա հերթական դեպքն է, հերքեք կամ հաստատեք. այսօր ԱԺ նախագահ, ՀՀ նախագահի պարտականությունները ստանձնած Ալեն Սիմոնյանը լրագրողի այս հարցին ի պատասխան ասաց. «Մենք շատ լուրջ խնդիր ունենք այդ առումով, որ հաճախ երեւի շտապում են իմ հետ կապված հայտարարություն անեն ու լավ չեն ստուգում: Նշված գույքը 2012 կամ 2015 թվականին դա կոմունալ պուճուր բնակարան էր՝ տատիկիս բնակարանն էր եւ վաղուց վաճառվել է: Որեւիցե նշելու բան չի եղել, երբ ես պաշտոնյա եմ եղել եւ հիմա էլ չկա ու ապագայում էլ չի լինելու: Խորհուրդ եմ տալիս նման դեպքերում ավելի ուշադիր լինեն, միշտ տնտղեն, ինչպես անում են, որովհետեւ վստահ եմ, որ որեւէ բան, որ օրենքի հետ անհամապատասխանություն կարող է ունենալ, չի կարող լինել: Իսկ նշված գույքը երեւի 8-10 տարի առաջ վաճառված է եղել: Ոչ մի գույք, ոչ մի նման բան չկա, կարող են նորից ստուգել:
Ես արդեն քննարկել եմ մեր փաստաբանների հետ, կդիմեմ դատարան, հերքում կպահանջեմ, հիմա խորհրդակցում եմ: Այնտեղ ակնհայտ զրպարտություն կա: Նաեւ ինձ ասացին, որ կա բանկային գաղտնիքի հետ կապված օրենսդրական խնդիր: Նորմալ է, որ տնտղում են, ես բարձրաստիճան պաշտոնյա եմ, ուղղակի պետք է մի քիչ գրագետ ձեւով արվի: Ամեն անգամ վերնագիր գրել, հետո հերքելով չի ստացվի: Դա իմ տատիկի մոր կոմունալ բնակարանն է եղել, որը 7-8 տարի առաջ վաճառվել է»:
Հռիփսիմե ՋԵԲԵՋՅԱՆ
