«Տեղական ինքնակառավարման մարմինների մասին» օրենքում կատարած փոփոխություններից հետո, անցած տարվա դեկտեմբերից՝ համայնքի ղեկավարները 1000–ից ավելի հաշվառված բնակիչ ունեցող բնակավայրի վարչական ղեկավարը պիտի նշանակեն բարձրագույն կրթություն ունեցող անձանց։ 2020թ.-ի դեկտեմբերի 22-ին, ոստիկանության Գորիսի բաժին դիմում էր ներկայացվել, որ Տեղ համայնքի ղեկավար Դավիթ Ղուլունցի որոշմամբ՝ Կոռնիձորի վարչական ղեկավար է նշանակվել բարձրագույն կրթություն չունեցող 57-ամյա Լենտուշ Հակոբջանյանը։
Բողոքից հետո Տեղ համայնքի ղեկավարը գտել է ելքը․ Լենտուշ Հակոբջանյանին ազատելով վարչական ղեկավարից՝ նշանակել է օպերատոր, իսկ բարձրագույն կրթություն ունեցող գործավար-օպերատոր Լուսինե Քարամյանին՝ վարչական ղեկավար։
Արդյոք սա չի նշանակում, որ Կոռնիձորի վարչական ղեկավարը դե ֆակտո Լենտուշ Հակոբջանյա՞նն է՝ Aravot.am-ի այս դիտարկմանը Դավիթ Ղուլունցն ասաց․ «Լենտուշ Հակոբջանյանը ի՞նչ կապ ունի, եթե ինքը աշխատում է որպես օպերատոր։ Վարչական ղեկավարը Լուսինե Քարամյանն է, ինքն էլ ղեկավարում է, փորձ ունի»։
Տեղ համայնքի ղեկավարը տեղյակը չէր արդյոք ոստիկանությունում հարուցված գործը կարճվե՞լ է, թե՞ ոչ։
Կարդացեք նաև
«Այն ժամանակ էլ հրամանում գրել էինք, որ Լենտուշը ժամանակավոր պաշտոնակատար է՝ հաշվի առնելով, որ Կոռնիձորը սահմանամերձ բնակավայր է»,-նշում է Դավիթ Ղուլունցը։
Արմեն ԴԱՎԹՅԱՆ
