Կորոնավիրուսային հիվանդացության դեպքերն օրեցօր ավելանում են, ու չնայած այսօր ավելի քիչ նոր դեպք է արձանագրվել, քան նախօրեին, սակայն մասնագետներն ասում են, որ վարակման ցուցանիշներն ավելանալու են։
Ըստ առողջապահության նախարարության այսօր տարածած հաղորդագրության, հաստատվել է կորոնավիրուսային հիվանդացության 2594 նոր դեպք, մահվան` 6 դեպք։ Իսկ երեկվա տվյալներով՝ կորոնավիրուսային հիվանդության 3536 նոր դեպք է հաստատվել, մահ չի գրանցվել:
Ռոմելլա Աբովյան
ԱՆ հիվանդությունների վերահսկման եւ կանխարգելման ազգային կենտրոնի վարակիչ եւ ոչ վարակիչ հիվանդությունների համաճարակաբանության վարչության պետ Ռոմելլա Աբովյանն Aravot.am-ի հետ զրույցում ասաց՝ ամբողջ աշխարհում է իրավիճակը լարված, նոր դեպքերի բարձր ցուցանիշը հիմնականում պայմանավորված է օմիկրոն շտամի շրջանառությամբ․ «Դիտարկելով այլ երկրների փորձը` միանշանակ, մենք էլ մեզ մոտ սեկվենավորում ենք արել, անջատել ենք օմիկրոնը, եւ հիվանդացության բարձր ցուցանիշը օմիկրոնի հետեւանք է»։
Կարդացեք նաև
Այլ երկրների ցուցանիշները ցույց են տալիս, որ թեեւ շրջանառվում է օմիկրոն շտամը, սակայն մահվան դեպքերն են քիչ, իսկ Հայաստանում այսօրվա տվյալով վեց մահ է գրանցվել։ Արդյոք մահացածների մոտ օմիկրոն շտամն է եղել, թե՞ դելտա, տիկին Աբովյանն ասաց, որ նման տեղեկատվություն չունեն․«Բայց թերագնահատել օմիկրոն շտամը, ճիշտ չէ։ Այլ երկրներում մահերի ցածր ցուցանիշը պայմանավորված է պատվաստումային բարձր ցուցանիշով։ Ապացուցված է, որ պատվաստված անձի մոտ հիվանդացությունը շատ ավելի թեթեւ է ընթանում, քան չպատվաստված անձի մոտ։ Այստեղ մենք ռիսկ ունենք նաեւ մահերի գրանցման հետ կապված, քանի որ պատվաստումային ցուցանիշը ցածր է եւ չենք կարող համեմատել այլ երկրների հետ»։
Տիկին Աբովյանի խոսքով՝ օմիկրոնն էլ վտանգավոր է, ինչպես դելտա շտամը, այսինքն, ախտահարվում են տարբեր օրգան համակարգեր․ «Բայց ի տարբերություն դելտայի, օմիկրոնը թոքային հյուսվածքը, որպես այդպիսին, պատվաստվածների մոտ չի ախտահարում։ Բայց քանի որ նոր շտամ է եւ դեռ պարզ չէ, թե ինչ կարող է լինել, ուղղակի դիտարկում ենք այլ երկրների փորձը։ Գիտենք, որ շատ բարձր վարակելիություն ունի ու բարձր ցուցանիշներ են արձանագրվում։ Վրաստանում աննախադեպ հակառեկորդ է գրանցվել՝ 18 հազար նոր դեպք է գրանցվել եւ 41 մահվան դեպք»։
Օմիկրոնի ախտանշանները նման են սուր շնչառական վարակին՝ քթից արտահոսք, հազ, ընդհանուր թուլություն, կարող է նաեւ մկանացավ լինել։
Բժշկի հավաստմամբ՝ մեր երկրում աննախադեպ քանակի կրկնավարակներ են արձանագրվում` օրական 200-300 դեպք։
Եվ անկախ նրանից՝ պատվաստված եք, թե՝ ոչ, ունեք բնական իմունիտետ, թե՝ ոչ, բժիշկը հորդորում է պահպանել անվտանգության կանոնները. ովքեր պատվաստված չեն, անպայման պատվաստվեն, նրանք, ովքեր երկու դեղաչափով պատվաստված են, անպայման ստանան խթանիչ՝ բուստեր դեղաչափը, քանի որ ապացուցված է, որ բուստեր պատվաստումն արդյունավետ է օմիկրոնի դեմ։
Նոր շտամների սպասե՞լ, թե՞ ոչ, Ռոմելլա Աբովյանն ասաց՝ ապացուցված է, որ շատ արագ է մուտացվում կորոնավիրուսային հարուցիչը, այնպես որ, նոր շտամի ի հայտ գալը չի բացառվում, ընդ որում, յուրաքանչյուր հաջորդ շտամը դուրս է մղում նախորդին։
Նելլի ԲԱԲԱՅԱՆ
