Հասարակությանը հրամցվում է կեղծ տեղեկատվություն՝ ընդ որում իշխանությունների կողմից: Այսօր անդրադառնալով վարչապետ Նիկոլ Փաշինյանի՝ ասուլիսում հնչեցրած հայտարարություններին, «Հայելի» ակումբում ասաց պատմական գիտությունների դոկտոր, թուրքագետ Ռուբեն Մելքոնյանը:
Նրա խոսքով, այն միտքը, թե Հայաստանը Թուրքիային երբեք հողային պահանջներ չի ներկայացրել, եւ ինքը շարունակում է այդ գիծը ու հիմա էլ Հայաստանը որեւէ հողային պահանջ չունի, կեղծ է. «Այո Հայաստանի հանրապետությունը Թուրքիային հողային պահանջ չի ներկայացրել, բայց ՀՀ-ն երբեք չի ճանաչել 1921 թվականի Կարսի պայմանագիրը: Թուրքիայի պահանջն առ այսօր այն է՝ ոչ թե ճանաչենք Թուրքիայի ամբողջականությունը, այլ ճանաչենք Կարսի պայմանագիրը»:
Ըստ Ռուբեն Մելքոնյանի ՀՀ երեք նախագահներն էլ չեն ճանաչել Կարսի պայմանագիրը. «Դա անօրինական պայմանագիր է, որովհետեւ 1921 թվականին ստորագրող կողմերը միջազգայնորեն ճանաչված պետություններ չեն եղել՝ Թուրքիան եւ բոլշեւիկյան Ռուսաստանը: Կարսի պայմանագիրը լի է անօրինականություններով, մասնավորապես՝ Անին, Սուրմալուն եւ այլն Թուրքիային են կցվել առանց որեւէ իրավական հիմնավորման»:
Ըստ պարոն Մելքոնյանի, Խորհրդային միությունն էլ երբեմն հայտարարել է, որ այդ պայմանագիրն անօրինական է. «Անգամ Ստալինն այն ժամանակ հայտարարել է, որ այդ պայմանագիրը ստորագրվել է այն ժամանակ, երբ Խորհրդային միությունը թույլ էր: Հայաստանն այդ գիծն է շարունակում: Եվ մենք չենք ճանաչել Կարսի պայմանագիրը: Բայց մենք չենք հայտարարել, որ չենք ճանաչում Թուրքիայի այսօրվա սահմանները: Այսինքն՝ Հայաստանը հողային պահանջ չունի, բայց ՀՀ-ն անօրինական Կարսի պայմանագիրը չի ճանաչում»:
Կարդացեք նաև
Ռուբեն Մելքոնյանի խոսքով, Թուրքիան տարբեր տարիներին փորձել է հասնել նրան, որ ճանաչեն Կարսի պայմանագիրը եւ օրինականացնեն անօրինական ձեւով խլված հողերը. «Ճիշտ է Հայաստանը չունի այն հնարավորությունը, որ հողերը հետ բերի, բայց Հայաստանը, որպես արժանապատիվ պետություն, կարող է հայտարարել, որ չի ճանաչում այն պայմանագիրը, որը հենված է իրավական անօրինականության վրա»:
Թուրքագետը համոզված է, որ այսօր Թուրքիայի նախապայմաններից մեկն այն է, որ Հայաստանը ճանաչի Կարսի պայմանագիրը եւ այսօրվա իշխանություններն ասում են՝ որեւէ խնդիր չկա, նախկին իշխանություններն էլ որեւէ պահանջ չեն ներկայացրել:
Ինչ վերաբերում է Հայոց ցեղասպանության հարցին, որն ըստ Փաշինյանի, Սփյուռքի, Հայ դատի ճանաչման խնդիրն է, այդ հարցը միշտ եղել է անկախ Հայաստանի օրակարգում՝ սկսած 1990-ականներից եւ ամենակարեւորը՝ դա ամրագրված է փաստաթղթով՝ Անկախության հռչակագրով. «30 տարվա ընթացքում տարբեր պետություններ ճանաչել են Հայոց ցեղասպանությունը, հիմա տարօրինակ կլինի հայտարարել, որ դա Հայաստան պետության հետ կապ չունի եւ դրանով զբաղվում են սփյուռքը, տարբեր կառույցներ»:
Նրա խոսքով, Ցեղասպանության 100-ամյակին Հայաստանն ընդունեց միասնականության հռչակագիր, որտեղ նշված է, որ Հայաստանը դիրքավորվում է որպես պետություն, որն աշխարհում առաջամարտիկ է ցեղասպանությունների դատապարտման, դրանք այլեւս չկրկնելու պայքարի եւ այլն. «Պատկերացրեք՝ Իսրայելը հրաժարվի ցեղասպանությունից»:
Ռուբեն Մելքոնյանի խոսքով՝ մեծագույն կեղծիք է նաեւ այն, որ Հայաստանը ճանաչել է Ադրբեջանի տարածքային ամբողջականությունը եւ Արցախը երբեք չի լինելու Հայաստան. «Հայաստանը Ադրբեջանի տարածքային ամբողջականությանը ճանաչել է առանց Արցախի. Դա հստակ բացատրված է տարբեր հայտարարություններում, այդ թվում եւ Ռոբերտ Քոչարյանի հայտարարությունում՝ որ Արցախը, Լեռնային Ղարաբաղի ինքնավար մարզը, իրացնելով իր իրավունքները, որպես Սովետական միության քաղաքացիներ, եւ Ադրբեջանի հետ, կամ նրանից առաջ դուրս է եկել Խորհրդային միության կազմից:
Այսինքն՝ անկախ Ադրբեջանը երբ դուրս է եկել, իր կազմում արդեն չուներ Լեռնային Ղարաբաղը, հետեւաբար, երբ մենք ճանաչում ենք անկախ Ադրբեջանը, մենք ուզենք էլ՝ չենք կարող Արցախը ճանաչել նրա մաս, որովհետեւ Արցախը իրավական առումով նրա մասը չէր կազմում: Եվ, մանիպուլացնել՝ նախորդ բոլոր իշխանությունները ճանաչել են Ադրբեջանի տարածքային ամբողջականությունը, այսինքն՝ Արցախը, կեղծ է»:
Նա հարց է տալիս՝ եթե ճանաչել էինք, ապա ինչո՞ւ չէին ադրբեջանցիները վերցնում Արցախը:
Լուսինե ԲՈՒԴԱՂՅԱՆ
