«Խորհուրդը դեռեւս քննարկում, հանդիպում չի արել։ Կլինի՝ կսկսենք քննարկումները։ Մենք 2015թ․-ին Սերժ Սարգսյանին փոփոխությունների առաջարկներ էինք ներկայացրել, որոնք չեն ընդունվել»,-Եռաբլուրում լրագրողների հետ զրույցում այսօր ասաց «Լուսավոր Հայաստան» կուսակցության առաջնորդ, ԱԺ նախկին պատգամավոր Էդմոն Մարուքյանը՝ անդրադառնալով սահմանադրական փոփոխությունների խորհրդում ԼՀԿ-ի առաջիկա անելիքներին։
«Ասել ենք, որ այս սահմանադրությունը սուպերվարչապետական է՝ անատամ խորհրդարանական լիազորություններով, իսկ նախագահը խորը սահմանափակումներ ունի։ Ասել ենք, նաեւ, որ ՏԻՄ-ների, դատական իշխանության հետ կապված խնդիրներ կան։ Երբ սահմանադրական փոփոխությունների խորհուրդը սկսի գործել, պետք է նախ ախտորոշում անել՝ ինչո՞ւ ենք ուզում սահմանադրական փոփոխություններ անել։ Կարծիք կա, որ հանրաքվեները միշտ կեղծվել են, ուստի նոր սահմանադրություն է պետք։ Կարծիք էլ կա, որ սուպերվարչապետական համակարգը պետք է փոխել, որ պետք է անցնել կիսանախագահական համակարգի,-նշեց Էդմոն Մարուքյանը։
Նրա անձնական համոզմամբ՝ պետք է ունենալ ամբողջական խորհրդարանական կառավարում, որովհետեւ այսօր չկա խորհրդարանական կառավարում․ «Մեծ հարց է՝ սահմանադրությունը կփոխվի՞, թե ոչ։ Փաթեթ կպատրաստենք։ Հանրաքվե կլինի, թե ոչ. կապրենք կտեսնենք»։
Կարդացեք նաև
Լուիզա ՍՈՒՔԻԱՍՅԱՆ
