Բռնցքամարտի ազգային հավաքականի գլխավոր մարզիչ Կարեն Աղամալյանը «Դինամո» մարզադահլիճում ամեն օր հետեւում է ռինգում Հայաստանի առաջնության մասնակիցների գործողություններին: Արդեն երեք օր անցել է, եւ Aravot.am-ը նրան խնդրել է կիսվել տպավորություններով:
Կարեն Աղամալյան
«Կան մի քանի երիտասարդներ, որոնք առաջին անգամ են մասնակցում մեծահասակների առաջնությանը, սակայն, ցավոք, նոր վառ անուն չեմ տեսել: Ես երիտասարդներից ավելին էի սպասում: Բայց սպասենք: Գուցե, կիսաեզրափակիչներում իրենց կդրսեւորեն: Հավաքականի առաջատարներից մասնակցում են գրեթե բոլորը: Հովհաննես Բաչկովի, եւ Կարեն Տանականյանի բացակայությանը նախորդ զրույցում անդրադարձել ենք: Բացակայում է նաեւ Արման Դարչինյանը, որը նույնպես առաջիկայում պրոֆեսիոնալ մենամարտ ունի ԱՄՆ-ում: Մյուս առաջատարներից, չէի ասի, թե դժգոհ եմ, սակայն նրանցից էլ ակնկալիքներս ավելի մեծ էին: Կիսաեզրափակիչ եւ եզրափակիչ մենամարտերից հետո կորոշենք, թե որ բռնցքամարտիկը որ մրցմանը կմասնակցի: Հիշեցնեմ, որ մի մասը կնախապատրաստվի մայիսին Երեւանում կայանալիք մեծահասակների Եվրոպայի առաջնությանը, մյուսը՝ մինչեւ 22 տարեկանների Եվրոպայի առաջնությանը»,-ասաց Կարեն Աղամալյանը:
Գլխավոր մարզիչը նաեւ տեղեկացրեց, որ Եվրոպայի երեւանյան առաջնության համար հավաքականի կմախքը հիմնականում պատկերացնում է եւ դժվար թե փոփոխության ենթարկվի, եթե «արտակարգ դեպքեր» չլինեն, որովհետեւ այդ մրցաշարը փորձադաշտ չէ:
Մեր դիտարկմանը, թե ռինգում, այնուամենայնիվ, ուժեղ հարվածների տիրապետող բռնցքամարտիկներ, կարծես, չեն երեւում, Կարեն Աղամալյանը պատասխանեց. «Այսպես ասած, խաղացող բռնցքամարտիկներ միշտ էլ ունեցել ենք, դա հայկական ոճն է: Սակայն ժամանակակից բռնցքամարտը դրան զուգահեռ պահանջում է չոր, խփող, ռինգում կռիվ անող բռնցքամարտիկներ: Այսօրվա բռնցքամարտում էլ մրցավարությունը մի փոքր այլ է: Ու ձեր դիտարկումը ճիշտ է. արդեն երրորդ օրն է հետեւում եմ մարտերին ու այդպիսի բռնցքամարտիկներ չեմ տեսնում»:
Կարդացեք նաև
Մասնագետը խնդրի լուծումը տեսնում է մարզադպրոցներում, ակումբներում եւ անձնական մարզիչների մեջ: «Ես ամեն անգամ նրանց հորդորում եմ մեծ ուշադրություն դարձնել այս խնդրին»,-ասաց նա:
Աշոտ ՀԱԿՈԲՅԱՆ
