«Որքան էլ զարմանալի է արձանագրել, բայց վերջին երկու տարում ուժգնացած մարտահրավերներից է քաղաքացիների մասնակցության խիստ նվազ մակարդակը»,-«Հայկական բարեգործական ընդհանուր միության» եւ Հայաստանում Ֆրանսիայի դեսպանության կազմակերպված «Գաղափարների գիշեր» ամենամյա միջոցառման ժամանակ այսօր անդրադառնալով քաղաքացիական հասարակության դերին եւ նշանակությանը՝ հայտարարեց «Ինֆորմացիայի ազատության կենտրոնի» նախագահ Շուշան Դոյդոյանը։
«Թվում է, թե հետհեղափոխական ՀՀ-ում մասնակցությունը պետք է առավելագույն աստիճանի լինի, սակայն տեսնում ենք միտում, որը սրվեց հետպատերազմյան ժամանակահատվածում։ Կառավարությունը, պետական բոլոր մարմինները «փակվում» են։ Կարծես ինքնապաշտպանական բնազդ է կիրառվում, որպեսզի հանկարծ որեւէ մեկը մի թթու խոսք չասի իրենց, հանկարծ ինչ-որ մեկը չքննադատի։ Առավել եւս, երբ մասնագիտական կառույցներն ու անհատներն են առողջ քննադատությամբ հանդես գալիս․ զրո արձագանք է լինում։ Անցած քսան տարում չեմ կարողանում հիշել դեպքեր, երբ լրագրողների իրավունքները սահմանափակող օրենսդրական նախաձեռնությունների շուրջ կառուցողական կարգավորումներ են արվում, սակայն ԱԺ-ն զրո արձագանք է ունենում։ Ցավով եմ ասում այս մասին։ Կառավարությունը պետք է փայփայեր քաղաքացիական հասարակության ներուժը։ Սա զարգացող միտում է»,-համոզմունք հայտնեց Շուշան Դոյդոյանը։
Լուիզա ՍՈՒՔԻԱՍՅԱՆ
