«Այն առաջարկները, որոնք ՀՀ-ի կողմից ներկայացվել են գործընկերներին, դրանք նախապայմաններ չեն։ Քանիցս ասել ենք՝ որպեսզի սահմանազատման եւ սահմանագծման գործընթացը հնարավոր լինի իրականացնել գործնականում, նախքան դրանց սկսելը՝ պետք է ապահովել նվազագույն անվտանգային պայմաններ, որպեսզի համապատասխան հանձնաժողով ձեւավորվի»,-լրագրողների հետ ճեպազրույցում այսօր անդրադառնալով հարցադրմանը, որ Բաքուն մերժել է սահմանագծման եւ սահմանազատման գործընթացին առնչվող ՀՀ առաջարկները, քանի որ դրանք նախապայման է համարում՝ ասաց ՔՊ-ական պատգամավոր, ԱԺ արտաքին հարաբերությունների հանձնաժողովի նախագահ Էդուարդ Աղաջանյանը։
Նրա խոսքով․ «ՀՀ-ի առաջարկներն ուղղված եւ միտված են այդ երաշխիքների ապահովմանը։ Մեր դիրքորոշումը հստակ է։ Կարծում եմ՝ գործնականում (մենք ընթացքում կհամոզվենք) հնարավոր չի լինի գործընթաց սկսել, որովհետեւ առանց նշյալի՝ ռիսկերը բարձր են, որ իրավիճակը կարող է ավելի վատթարանալ»։
Ըստ Աղաջանյանի՝ Բաքվի տեսանկյունից նման ենթադրություն անել չի կարելի, որովհետեւ նման գործընթաց սկսելու համար դա նվազագույն նախապայմանն է․ «Սա եղել է ՀՀ դիրքորոշումը։ Մեր ընկալումն այն է, որ ՌԴ գործընկերները կիսում են մեր դիրքորոշումը։ Բանակցությունները պետք է շարունակվեն, իր առաջարկներից ՀՀ-ն չի հրաժարվում։ Առաջին քայլ, որպես նախադրյալ գործընթաց սկսելու համար, պետք է լինի զորքերի հայելային հետքաշումը, դա լավագույն տարբերակն է»։
Կարդացեք նաև
Լուիզա ՍՈՒՔԻԱՍՅԱՆ
