«Եթե ընտրություններում մենք չհաղթենք, ես ձեզ վստահեցնում եմ, որեւէ մեկը չի գնալու եւ կեղծի, լցնի քվեաթերթիկներ: Ես ինքս հազար անգամ տեսել եմ, 15 տարի՝ 2003-ից մինչեւ 2018 թվականը ես եղել եմ ընդդիմադիր քաղաքական գործիչ, ակտիվիստ: Ես ինքս եմ տեսել: 2013-ին Արտաշատում եղել եմ դիտորդ, Յուվեցի Կարոն եղել է, քվեաթերթիկներ են լցոնել: Ես դիմել եմ տեղի ոստիկանություն, ՀՔԾ-ն ի վերջո կոծկել է այդ գործը, կամերայի չիպն են գողացել: Այսինքն, ինչ-որ մեկը եթե ասի՝ ընտրություններ չեն կեղծվել, ես կասեմ՝ հա, հաջողություն, գնա քո ճանապարհով»,- Aravot.am-ի հետ զրույցում ասաց ՔՊ պատգամավոր Նարեկ Բաբայանը:
Մեր հարցին, որ այս տարիներին իշխանություն եք, ընտրությունների քանի՞ կեղծարար եք բռնել, չբռնեցիք, եղան զուտ քաղաքական հայտարարություններ ու վերջ՝ Նարեկ Բաբայանը պատասխանեց. «Գիտեք, շատ դժվար է գտնել այդ փաստական ապացույցները: Նույնիսկ այն, որ ես իմ աչքով եմ տեսել, ես ինքս չեմ ունեցել դրա տեսագրությունը, օրինակ: Երբ որ ես ասում եմ, որ 2003-ին իմ ծնողը թույլ չի տվել, որ լցոնում անեն դպրոցում, բնականաբար, որեւէ փաստական ապացույց չկա, բայց մենք ունենք այդ համոզմունքը: Մենք վստահ ենք, որ այդ ամեն ինչը արվել է, մենք հազար ծանոթ ունենք: Մեր շենքից է եղել այն մարդը, որն ընտրակաշառք է բաժանել, մեզ է առաջարկել դեռեւս այն թվականին: Դուք գնացեք գյուղերը, որտեղ մենք ստացել ենք ամենացածր ձայները»:
Հարցին՝ այսինքն, լծակներ ունենալով՝ չե՞ք կարողանում բացահայտել ընտրակեղծարարներին՝ նա պատասխանեց. «Դե գիտեք ինչ, նախ, մենք չենք, համապատասխան իրավապահ մարմիններն են: Շատ են այդպիսի դեպքերը: Ամերիկայում ամենահայտնի հանցագործներից մեկը դատապարտվել է ընդամենը իր արած մի հանցագործության համար, մենակ դա են կարողացել գտնել, բայց բոլորը վստահ են եղել, որ ինքը շատ այլ հանցագործությունների հեղինակ է: Իսկ որո՞նք են այն գործիքները, որոնցով այդ ամեն ինչը պետք է անենք: Այնպես չի, որ մենք չենք ուզում, որ բացահայտվի, բայց ո՞ր գործիքներով: Դատախազությունը, քննչական բոլոր մարմինները, որպես ինստիտուտ չեն կայացել եւ դա էլ ենք մենք ժառանգություն ստացել»:
Դիտարկմանը, որ ձեր իշխանության ենթակայությամբ գործում են, կարելի է ասել՝ անդեմ մարմիններ են, վարչապետն ինչ ասի՝ անում են, շարժվում են իր խոսքով, այսինքն, դուք լծակի խնդիր չունեք՝ Բաբայանն արձագանքեց. «Ենթակայության խնդիր չկա բացարձակապես, վարչապետն ինչ ասի, այդպես չի եւ վարչապետը չի ասում, իր լիազորությունները չի վերազանցում: Հարցն այնտեղ է, որ օրինակի համար քննիչները կարող են լինել տարբեր ազդեցության տակ, պրոֆեսիոնալ չլինեն այնքան, որ կարողանան բացահայտել: Եվ լավագույն մասնագետները այդ աշխատավարձով չեն աշխատում, գնում են մասնավոր»:
Կարդացեք նաև
Խոսելով նախկին իշխանությունների «թալանի» մասին՝ հարցրեցինք՝ ո՞ւր են ձեր ապացույցները, ընդդիմությունն ասում է՝ բա որ թալանել ենք, ցույց տվեք գեթ մեկ դատական ակտ՝ Նարեկ Բաբայանը պատասխանեց. «Շատ-շատ գործեր ընթացքի մեջ են, դրանք շատ դանդաղ են ու ես անձամբ գոհ չեմ, որ դանդաղ են: Ցավոք, դա իրողություն է: Բայց ես վստահ եմ, ոնց վստահ եմ, որ ընտրությունները կեղծվում էին, այդ նույն կերպ վստահ եմ, որ կոռուպցիան եղել է համակարգված: Ես հիմա որեւէ երաշխիք չեմ կարող տալ, որ որեւէ թաղապետարանի աշխատակից, որեւէ մաքսայինի աշխատակից, կամ ինչ-որ ոստիկան, ինչ-որ մեկը կաշառք չի պահանջում եւ ստանում: Այդտեղ երկու հոգու համաձայնություն է տեղի ունենում՝ ես ձեզ առաջարկում եմ, դուք ինձ կաշառք եք տալիս, այդտեղ մենք մտնում ենք կոռուպցիոն գործարքի մեջ: Այն ժամանակ եղել է համակարգային կոռուպցիա: Հիմա դուք ասում եք դրա համար փաստե՞ր: Դա իմ համոզմունքն է, որովհետեւ ես այս երկրում ապրել եմ, շատ-շատ մարդկանց հետ շփվել եմ, ես դա գիտեմ: Բայց թե երբ ու ինչ դրվագներով, ինչ քրեական գործերով ու ինչ դատական ակտերով դա կապացուցվի, ես ցավոք չեմ կարող այդ հարցին պատասխանել: Բայց ես վստահ եմ, որ այն ժամանակ կոռուպցիան բրգաձեւ էր: Օրինակի համար «Երեւան» հիմնադրամի հետ կապված կարող եք ծանոթանալ, թե ինչ քրեական գործ է, Տարոն Մարգարյանի հանդեպ ինչ քրեական գործ է հարուցված: Հա՜, իհարկե, կարող եք ասել՝ 3 տարի է անցել, ինչո՞ւ է երեք տարի անցել: Ես էլ կարող եմ ասել, բայց ո՞ւմ ասեմ»:
Հարցին՝ հարուցված է քրեական գործ, ասում եք՝ Տարոն Մարգարյանի անունը, բայց ո՞ւր է հիմա Տարոն Մարգարյանը՝ ձեր կողքին՝ Նարեկ Բաբայանը արձագանքեց. «Երբ որ կգա այդ պահը, մեր կողքին չի լինի, հարցը դա չի: Ես ասում եմ՝ ինչի՞ է 3 տարի անցել, կարող էր դա 6 ամսում լինել: Բայց այդպես չի, որովհետեւ այդ մարմինները աշխատում են այդ տեմպով: Ինձ դա դուր չի գալիս, ձեզ՝ չգիտեմ: Պատկերացրեք, պետք է ինչ-որ մի գործ արվի ուրագով, բայց այդ ուրագը շատ բութ է»:
Նարեկ Բաբայանը հայտարարեց, որ Հայաստանում ինստիտուտներից որեւէ մեկը կայացած չի. «Օրինակ, մտածում էինք, որ բանակը գոնե կայացած է, մի քիչ կասկածում եմ, որ ԿԲ-ն որոշ չափով ավելի կայացած է, բայց աշխատավարձն այնտեղ 3 անգամ բարձր է այլ տեղերից: Միայն այդ պատճառով այդ կասկածն ունեմ: Այդտեղ մասնագետները լուրջ վերապատրաստումներ են անցնում, որոնք թանկ արժեն: Մյուս ինստիտուտների հետ կապված՝ նախարարություններ եւ այլն, ես աշխատել եմ կառավարությունում, դուք գիտեք, շփվել եմ, այդ դանդաղկոտությունը, ամեն ինչը, պատասխանատվությունից խուսափելը դա համակարգային է: Այն ժամանակ միակ աշխատող ինստիտուտը եղել է կոռուպցիան, ինքը եղել է վերից վար, ինքը եղել է ինչքան խոշոր, այնքան ավելի արագ ու ավելի որակյալ: Եթե դու մի քանի շենք ես սարքում ու մեծ թափ ունես, մեծ կաշառք ես տալիս, քո գործը լրիվ իդեալական է, եթե դու այդպես մի 100 դոլարի կաշառք ես տալիս, քոնը երեւի մի ամիս կամ երկու շաբաթ ավելի ուշ կլինի»:
Հռիփսիմե ՋԵԲԵՋՅԱՆ
