Եվրոպայի խորհրդի խորհրդարանական վեհաժողովի (ԵԽԽՎ) լիագումար նիստի ընթացքում երեկ տեղի ունեցավ քննարկում՝ ԵԽԽՎ-ում ռուսական պատվիրակության լիազորությունների հարցով: Ինչպես արդեն տեղեկացրել ենք, մի շարք պատգամավորներ հանդես էին եկել նախաձեռնությամբ՝ համաձայն որի՝ վիճարկում էին ռուսական պատվիրակության լեգիտիմությունը, քանի որ պնդում էին, որ ՌԴ-ում խորհրդարանական ընտրություններն արդար չեն եղել:
ԵԽԽՎ-ում ռուսական պատվիրակության լիազորությունների հարցով Նախարարների կոմիտեն ներկայացրել էր որոշումը: Մինչ այս հարցով քննարկումը՝ ԵԽԽՎ նորընտիր նախագահ Թինի Քոքսը ներկայացրեց այդ որոշումը. «Նախարարների Կոմիտեն եզրակացնում է, որ պետք է վավերացվեն Ռուսաստանի Դաշնության խորհրդարանական պատվիրակության հավատարմագրերը»:
ԵԽԽՎ Մոնիտորինգի հանձնաժողովի կարծիքը ներկայացրեց իտալացի պատվիրակ Պիերո Ֆասսինոն ՝զեկույցով: Նա հայտարարեց. «Մոնիտորինգի հանձնաժողովը րոպեներ առաջ է ավարտել իր աշխատանքը և Վեհաժողովին ներկայացնում է զեկույց, որով առաջարկում է հաստատել ռուսական պատվիրակության անդամների լիազորությունները: Միևնույն ժամանակ պետք է նշեմ, որ ոչ ոք աչք չի փակում այն փաստի վրա, որ Ռուսաստանում մարդու իրավունքների հետ կապված լուրջ խնդիրներ կան: Նաև ուզում եմ ընդգծել ՌԴ-ում անցկացված խորհրդարանական ընտրությունները, որոնք մենք առաջին անգամ ենք դիտարկել և լուրջ խնդիրներ գրանցել: Մյուսը Ալեքսեյ Նավալնիի խնդիրն է, որն առանձին քննարկման հարց է: Եվ նաև Ուկրաինայի հարցն է, որը նուրբ խնդիր է և միջազգային օրակարգի առաջնահերթություն: Սակայն պետք է փաստենք, որ ռուսական պատվիրակության ներկայությունը Վեհաժողովում կարևոր է այդ երկրի քաղաքացիների իրավունքների պաշտպանության տեսանկյունից, նաև Եվրոպական դատարանի հասանելիության տեսանկյունից»:
Այնուհետև պատվիրակներն իրենց կարծիքներն արտահայտեցին ռուսական պատվիրակության անդամների լիազորությունները վավերացնել-չվավերացնելու հարցի վերաբերյալ: Օրինակ՝ թուրք պատվիրակ Հիսյար Օզսոյը, դիմելով ռուս պատվիրակներին և հուսալով, որ նրանք իրեն լսում են, ասաց. «Հավատարմագրերի հնարավոր վավերացումը չի նշանակում, որ այս Վեհաժողովը լավ է վերաբերվում ձեր երկրում տեղի ունեցող խախտումներին: Սա ընդամենը ևս մեկ բարի և անկեղծ հրավեր է բովանդակալից երկխոսության՝ ժողովրդավարության, մարդու իրավունքների և օրենքի գերակայության առումով կոնկրետ արդյունքների հասնելու համար»։
Կարդացեք նաև
ԵԽԽՎ-ում Լիտվայի պատվիրակության նախագահ Էմանուելիս Զինգերիսը, որը ռուսական պատվիրակությանը լիազորություններից զրկելու կողմնակից էր, ասաց. «Ես հիշում եմ Ռուսաստանի դեմոկրատական հասարակության տարիները. առաջին հերթին ես հիշում եմ իննսունականները, երբ հազարավոր ռուսներ ցույց էին անում մերձբալթյան անկախության օգտին։ Ովքե՞ր են այժմ ռուսական պատվիրակության անդամները. իրական ընդդիմություն ունե՞նք այնտեղ, ոչ: Ազատ և արդար ընտրություններ ունե՞նք։ Ոչ»:
Քննարկումից հետո ի վերջո բանաձևը 49 «կողմ», 19 «դեմ» և 8 «ձեռնպահ» ձայների հարաբերակցությամբ ընդունվեց: Այսինքն՝ ռուսական պատվիրակության լիազորությունները հաստատվեցին:
Տաթև ՀԱՐՈՒԹՅՈՒՆՅԱՆ
