Իրավապաշտպան Սաշիկ Սուլթանյանի գործով հերթական դատական նիստում այսօր Սաշիկ Սուլթանյանի պաշտպաններից Սամսոն Գալստյանը դատարանին տեղեկացրեց, որ փետրվարի 5-15-ը Սաշիկ Սուլթանյանը պատրաստվում է այցելել Բրյուսել, Փարիզ եւ Ստրասբուրգ՝ ԵԽ ներկայացուցիչների հետ ազգային փոքրամասնությունների խնդիրների առնչությամբ ՀՀ տեսակետները ներկայացնելու եւ փորձի փոխանակման համար։ Հաշվի առնելով նրա հրավերը եւ իրավապաշտպան գործունեությունը՝ պաշտպանը խնդրեց թույլատրել մեկնումը։
Մեղադրող դատախազ Արտակ Կարապետյանը չառարկեց, որպեսզի մեղադրյալին թույլատրվի մեկնել, առավել եւս, որ սահմանի հատման արգելք չկա, սակայն դատարանին առաջարկեց նրա վերադարձից հետո չթույլատրել սահմանը հատել ու նման միջնորդությունները քննարկել կոնկրետ դեպքերի համար, քանի որ նրա հանդեպ ամեն դեպքում առկա է խափանման միջոց՝ «ստորագրություն երկրից չհեռանալու մասին», ու թեեւ Սուլթանյանը նախկինում պատշաճ վարքագիծ է դրսեւորել, սահմանը չհատելու փաստն ապահովում է այդ խափանման միջոցի կատարումը։
Հիշեցնենք, որ «Մարդու իրավունքների եզդիական կենտրոն» հ/կ ղեկավար, իրավապաշտպան Սաշիկ Սուլթանյանին մեղադրանք է առաջադրվել ՀՀ քրեական օրենսգրքի 226-րդ հոդվածի 2-րդ մասի 1-ին կետով (Ազգային, ռասայական կամ կրոնական թշնամանք հարուցելը), որով Հայաստանում ապրող եզդիների իրավունքների խախտումների մասին խոսելը որակվել է որպես ազգային թշնամանքի հարուցում։ Սուլթանյանն իրեն մեղավոր չի ճանաչում։
Կարդացեք նաև
Դատարանը, վերադառնալով խորհրդակցական սենյակից, որոշեց Սուլթանյանի պաշտպանների միջնորդությունը բավարարել եւ նրան թույլատրվել վերոնշյալ ժամկետում բացակայել ՀՀ-ից։
Լուիզա ՍՈՒՔԻԱՍՅԱՆ
