Երեւան քաղաքի ընդհանուր իրավասության դատարանի Շենգավիթի նստավայրում այսօր Հայաստանի երկրորդ նախագահ Ռոբերտ Քոչարյանի եւ նախկին փոխվարչապետ, «Հայաստան» խմբակցության պատգամավոր Արմեն Գեւորգյանի գործով դատական նիստը հետաձգվեց: Ամբաստանյալները նիստին չէին մասնակցում:
Ռոբերտ Քոչարյանը կորոնավիրուսի թեստ էր հանձնել, պատասխանները պատրաստ կլինեն 17.00-ից հետո, իսկ Արմեն Գեւորգյանն առցանց տարբերակով մասնակցում էր ԵԽԽՎ ձմեռային նստաշրջանի աշխատանքներին:
Հիշեցնենք, որ նախորդ նիստում դատավոր Աննա Դանիբեկյանը մերժել էր Արմեն Գեւորգյանի փաստաբանների երկու միջնորդությունները պատգամավորական անձեռնմխելիության հարցի վերաբերյալ։ Արմեն Գևորգյանի նախկին պաշտպան Էրիկ Ալեքսանյանը միջնորդել էր կասեցնել գործով վարույթը և ԱԺ պատգամավորի կարգավիճակից բխող հարցի վերաբերյալ դիմել ՍԴ։ Արմեն Գեւորգյանի մյուս պաշտպանը՝ Լուսինե Սահակյանը միջնորդել էր ճանաչել Արմեն Գևորգյանի՝ որպես ԵԽԽՎ պատգամավորի անձեռնմխելիությունը, որպեսզի պատգամավորը կարողանա մասնակցել ԵԽԽՎ նստաշրջանի աշխատանքներին։ Ավելի վաղ դատարանը մերժել էր միջնորդությունը՝ ԵԽԽՎ նստաշրջանին մասնակցելու համար Գեւորգյանին արտասահման մեկնելու թույլտվության մասին։ Դատավորի կարծիքով՝ բավական կլիներ, որպեսզի Գեւորգյանը հեռակա մասնակցեր նստաշրջանին։ Միաժամանակ, դատարանը նիստը նշանակել էր հունվարի 25-ին՝ ԵԽԽՎ նստաշրջանի օրը՝ այդ կերպ զրկելով Գեւորգյանին հեռակա մասնակցության հնարավորությունից։
Կարդացեք նաև
Նելլի ԳՐԻԳՈՐՅԱՆ
