«Նախագահ Քոչարյանի կառավարման տարիներին է ՄԻՊ ինստիտուտը ներդրվել որպես ինստիտուտ։ Հետագայում ամրագրվել է 2005թ․-ի սահմանադրությունում։ Ինստիտուցիոնալ առումով գործադիր իշխանությունը եւ ՄԻՊ ինստիտուտը գտնվում են որոշակի հակադրության մեջ, եւ, այո, նախագահ Քոչարյանի տարիներին էր, որ էլ ավելի ամրապնդվեց ՄԻՊ ինստիտուտը, որը հետագայում՝ 2015թ-ի սահմանադրությամբ կատարելագործվեց»,-խորհրդարանում լրագրողների հետ ճեպազրույցում այսօր ասաց «Հայաստան» դաշինքի պատգամավոր Արծվիկ Մինասյանը՝ անդրադառնալով հարցադրմանն այն մասին, որ երեկ ՔՊ-ի ՄԻՊ թեկնածու Քրիստինե Գրիգորյանի ընտրության ժամանակ «Հայաստան» դաշինքը բարձրաձայնում էր, որ գործող իշխանությունը ճնշում է Արման Թաթոյանին, մինչդեռ նախկին օմբուդսման Լարիսա Ալավերդյանը փաստել է, որ նախագահ Ռոբերտ Քոչարյանի ժամանակ իր հանդեպ ճնշումներ են եղել․ «Ռոբերտ Քոչարյանը փոխե՞լ է կարծիքը ՄԻՊ ինստիտուտի հանդեպ»։
Մինասյանը նշեց․ «Ինչ վերաբերում է ՄԻՊ-ի վերաբերյալ երկրորդ նախագահի մոտեցումներին, ամրագրեմ կարեւոր բան՝ 2005թ․-ի սահմանադրական փոփոխություններով ընդլայնվեց մարդու իրավունքների պաշտպանությունը՝ ներառելով ոչ միայն ՄԻՊ ինստիտուտը, այլեւ պետական մարմինների համար սահմանելով կոնկրետ պատասխանատվություն։ Ուստի այս կարեւոր ինստիտուտի համակարգը ներդրվել է նախագահ Քոչարյանի ժամանակ։ Նա ոչ միայն կարեւորել, այլեւ զարգացրել է այդ ինստիտուտը»։
Լուիզա ՍՈՒՔԻԱՍՅԱՆ
