Երեկվանից ԱԺ գիտության, կրթության, մշակույթի, սփյուռքի, երիտասարդության եւ սպորտի հարցերի հանձնաժողովում քննարկվում է ՀՀ Հեռուստատեսության եւ ռադիոյի հանձնաժողովի անդամի թափուր տեղի համար «Հայաստան» խմբակցության կողմից առաջադրված Ռուբիկ Հակոբյանի թեկնածության հարցը:
ՔՊ պատգամավոր Թագուհի Ղազարյանը խոսեց Ռուբիկ Հակոբյանի արտահայտությունների մասին ու դիմեց նրան առաջադրած պատգամավորներին. «Մեր հնադարյա ու բազմաչարչար ժողովրդի մասին, ում սիրուց տոգորվում եք առավոտից երեկո, նա ասում է՝ «խառնամբոխ»: Էլ չեմ ասում այն բառերի մասին, որոնց դիմաց բառարանում գրված է գռհ., ինչը նշանակում է գռեհկաբանություն: Ես չեմ հավատում, պարոն Հակոբյան, որ դուք դեմ եք հանրային խոսքում գռեհկաբանությանը»:
Հետո նա անդրադարձավ լրագրող Վահե Մակարյանի հետ միջադեպին, երբ Հակոբյանն ասել էր՝ «տղամարդիկ մեզ կհասկանան»: Թագուհի Ղազարյանը մատնանշեց նաեւ Ռուբիկ Հակոբյանի մեկ այլ արտահայտություն. «Ի՞նչ է նշանակում՝ 25 տարին լրացած անձինք չեն կարող հեղինակություն վայելել: Կարող է այնպես պատահի, որ 80 տարեկանը լրացածն էլ հեղինակություն չվայելի: Դուք գիտե՞ք, որ Եղիշե Չարենցը «Երկիր Նաիրին» 25 տարեկանում է գրել, գիտե՞ք՝ այդ տարիքում արդեն գրե՞լ էր «Դանթեական առասպելը», «Կապուտաչյա հայրենիքը», «Խելագարված ամբոխները», բացե՞լ եք այդ ժամանակվա մամուլը, նա հեղինակություն վայելո՞ւմ էր մշակույթի ոլորտում, թե՞ չէ: Հորդորում եմ բացել Պոլսի մամուլը, տեսնել՝ 19-ամյա Դուրյանը հեղինակություն վայելո՞ւմ էր, թե՞ չէր վայելում, Թումանյանը, որ «Շունն ու կատուն» էր հեղինակել 17 տարեկանում, հեղինակություն վայելո՞ւմ էր: Մարդկանց անընդհատ իրենց երիտասարդ տարիքն ու իգական սեռը հիշեցնելով դոմինանտություն հաստատելու ձեր ձախորդ փորձերը ճչում են, որ դուք չեք կարող պահպանել խտրականության արգելքի մասին պահանջը, ինքներդ եք խտրականություն տարածում»:
Կարդացեք նաև
Ղազարյանի համար տարակուսելի էր նաեւ, որ Ռուբիկ Հակոբյանը մարտի 1-ը համեմատել է 44-օրյա պատերազմի հետ ու համեմատել նաեւ զոհերի թիվը. «Իհարկե, եթե Քոչարյանի գործունեությունը համեմատեք Ալիեւի հետ, կարող է վերջում պարզվել, որ Քոչարյանն ավելի քիչ հայ է սպանել, քան Ալիեւը: Ես առաջարկում եմ մյուս անգամ համեստություն չանել եւ համեմատել Թալեաթի հետ, գուցե այդպես ավելի դրական լույսի ներքո հնարավորություն ունենա հանդես գալու»:
Լիլիթ Գալստյան
«Հայաստան» խմբակցության պատգամավոր Լիլիթ Գալստյանին հանձնաժողովի մթնոլորտը հիշեցրեց մանկական այն խաղը, թե «ով վերջինը կխփի» կամ «ով տակ կմնա». «Զբաղված եք մանկական «բա դու…բա դո՞ւ», երկիրը կործանվում է, դրա մասին մտածեք»:
Ինչ վերաբերում է Ռուբիկ Հակոբյանի օգտագործած «գռեհկաբանությանը», Լիլիթ Գալստյանը հիշեցրեց ՀՌՀ անդամի ՔՊ-ի թեկնածուի՝ Արթուր Մանուկյանի ու Յոժի կատարումը. «Շուրթերս չեմ պղծի ասեմ՝ երեք տառանոց կատարումը»: Բացի այդ, ՔՊ-ականները աչք են փակել Արթուր Մանուկյանի փաստաթղթային «կեղծիքի» վրա. «Դա՞ է ձեր քաղաքական բարոյականությունը»:
Հռիփսիմե ՋԵԲԵՋՅԱՆ
