ԱՄՆ պետքարտուղարությունը կարգադրել է Ուկրաինայում ԱՄՆ դեսպանատանն աշխատող ամերիկացիների դուրս գալ այդ երկրից՝ Ռուսաստանի կողմից ռազմական գործողությունների սպառնալիքի հավանականության պատճառով:
«Պետքարտուղարությունը 2022թ. հունվարի 23-ին թույլատրել է Կիևում ԱՄՆ դեսպանատան վարձու աշխատողներին կամավորության սկզբունքով դուրս գալ, ինչպես նաև կարգադրել է դուրս բերել նրանց ընտանիքների անդամներին՝ Ռուսաստանի կողմից ռազմական գործողությունների պահպանվող վտանգի պատճառով»,- ասվում է Պետքարտուղարության հայտարարության մեջ:
Պետդեպը խորհուրդ է տվել Ուկրաինայում գտնվող ամերիկացիներին մտածել կոմերցիոն չվերթներով այդ երկրի տարածքը լքելու ուղղությամբ:
Կիրակի ավելի վաղ Պետդեպը խորհուրդ էր տվել իր քաղաքացիներին չայցելել Ռուսաստան՝ Ուկրաինայի հետ սահմանին լարվածության, անձնական անվտանգության պոտենցիալ սպառնալիքի և կորոնավիրուսի տարածման պատճառով: Հայտարարության մեջ նշված էր, որ դեսպանատան հնարավորությունները դժբախտության մեջ հայտնվածներին օգնելու համար սահմանափակ են:
Կարդացեք նաև
BBC-ն նաև հայտնում է, որ հունվարի 21-ին և 22-ին ԱՄՆ-ը Կիև է տեղափոխել 170 տոննա զենք և զինամթերք: Դա ԱՄՆ-ի կողմից Ուկրաինային ուղարկված ռազմական օգնության առաջին խմբաքանակն էր, և, ուկրաինական մամուլի տեղեկություններով, բաղկացած էր նռնականետներից և հրթիռային սարքավորումներից: Երկրորդ խմբաքանակի մասին կիրակի հայտնել է Ուկրաինայի պաշտպանության նախարար Ալեքսեյ Ռեզնիկովը:
Պատրաստեց Վիկտորյա ԱՆԴՐԵԱՍՅԱՆԸ
