ԱԺ փոխխոսնակ, «Հայաստան» խմբակցության պատգամավոր Իշխան Սաղաթելյանն ասել էր, որ Հադրութն ու Շուշին կարող ենք վերադարձնել, ինչը քննարկումների տեղիք էր տվել: Այսօր «Հայաստան» խմբակցության ղեկավար Սեյրան Օհանյանը երկրորդեց նրան. «Մեկն ասել էր, թե դրանից դավաճանության հոտ է փչում, եթե գիտեն ինչպես դա անել, ինչո՞ւ չեն անում: Տեսականորեն այդ ամենը հնարավոր է անել, պետք են լծակներ: Այսօր այդ լծակներն ունի քաղաքական իշխանությունը, իսկ երբ իշխանությունը լինի մեր տիրապետության տակ՝ ընդդիմության ձեռքերում, այդ դեպքում նաեւ հնարավոր է պայմանագրային ամբողջ գործընթացով, նաեւ բանակցային գործընթացով գնալ նրան, որ հասնենք տարածքների վերադարձին»:
Հարցին՝ եթե լծակները Նիկոլ Փաշինյանի ձեռքում են, մեխանիզմն էլ դուք գիտեք, ինչո՞ւ ջանքերը չեք համատեղում, որ Հադրութն ու Շուշին հետ բերենք՝ Սեյրան Օհանյանը պատասխանեց, որ մեխանիզմը բանակցություններն են, պետք են տեխնիկական, նաեւ ռազմական ու քաղաքական լուրջ հնարքների տիրապետել. «Լծակները թե՛ արտաքին հարաբերություններում, թե՛ ներքին, թե՛ անվտանգային, իրենց ձեռքում են: Դա նույնն է, որ ասում են, թե ինչ-որ գեներալ արցախյան պատերազմում ցուցում է տվել, որ զորքը հետ քաշվի, ինչ-որ բան է ասել…Միայն անգիտակից, գործից բան չհասկացող մարդիկ դա կասեն, որովհետեւ այն մարդը, որը պետական, ռազմական կառավարման համակարգում պաշտոնյա չէ, դերակատարում չունի, նա չի կարող որեւէ լծակ ունենալ՝ որոշումներ կայացնելու համար…Հիմա բանակցողը ես չեմ, որ իմանամ՝ Ադրբեջանը հետ կտա՞, թե՞ չի տա, պետք է ձգտել դրան»:
Հռիփսիմե ՋԵԲԵՋՅԱՆ
