Հեռուստատեսության եւ ռադիոյի հանձնաժողովի անդամի պաշտոնում «Քաղաքացիական պայմանագիրը» ներկայացրել է գրականագետ, թարգմանիչ ու բանաստեղծ, ՀՀ մշակույթի նախկին նախարար Հակոբ Մովսեսի Հակոբյանի (Հակոբ Մովսես) թեկնածությունը, որն այսօր քննարկվում է ԱԺ լիագումար նիստում։
«Հայաստան» դաշինքի պատգամավոր Արամ Վարդեւանյանը նրանից հետաքրքրվեց՝ քանի որ կողմ է արտահայտվել Նիկոլ Փաշինյանի իշխանությանը եւ ժամանակին նախարար է աշխատել Լեւոն Տեր-Պետրոսյանի նշանակմամբ, ի՞նչ դիրքորոշում ունի առաջին նախագահի՝ այս իշխանությանը տված «ազգակործան պատուհաս» արտահայտության վերաբերյալ։
Հաջորդ ելույթ ունեցող ՔՊ-ական Վահագն Ալեքսանյանը Վարդեւանյանին հիշեցրեց, որ 2007թ․-ին Լեւոն Տեր-Պետրոսյանը խոսում էր մոնղոլ-թաթարական նախագահի մասին, իսկ 90-ականներին Ռոբերտ Քոչարյանին հարցնում էր՝ «Հայր մեր»-ը գիտե՞ս»․․․
«Ռոբերտ Քոչարյանի բարդույթները, որոնք, ենթադրաբար, օդակաթիլային ճանապարհով փոխանցվում են նրա շրջապատի շատ մարդկանց, ամեն դեպքում գալիս են հենց Լեւոն Տեր-Պետրոսյանից։ Ռոբերտ Քոչարյանի այդ թերարժեքության բարդույթը, որը ձեւավորվել է ինտելեկտուալ կարողությունների ոչ փայլուն լինելու բերումով, նա փորձել է կոմպենսացնել մկանային, առնական ձեւանալու միտումով, գալիս է Լեւոն Տեր-Պետրոսյանից»,-հավելեց Վահագն Ալեքսանյանը։
Կարդացեք նաև
Նա նշեց․ «Ոչ ես, ոչ իմ թիմակիցները Լեւոն Տեր-Պետրոսյանից բարդույթներ չունենք։ Կարող ենք արձագանքել նրա վիրավորական արտահայտություններին կամ չարձագանքել, բայց Լեւոն Տեր-Պետրոսյանը մեր համար չի հանդիսացել եւ չի հանդիսանալու հոգեբանական «harassment»-ի ենթարկած մարդ»։
Ինչ վերաբերում է քննարկվող թեմային՝ հեռուստաեթերների բովանդակությանը, Ալեքսանյանի խոսքով՝ ատելության խոսքը գերակշռող է դարձել վարչապետի, նրա կնոջ ու երեխաների հանդեպ․ «Ամենօրյա ատելության քարոզ է՝ գումարի դիմաց։ Շատերը չեն կարողացել տարբերակել եւ գիտակցել, որ իրենք ոչ թե վերբալ-մարմնավաճառ են, այլ լրագրող։ Թող ներեն ինձ այդ մասնագիտության իրական կրողները, բայց այդպիսիք հեռուստաեթերում ԳՇ պետին հրավիրում էին տանկերը մտցնել Երեւան, որովհետեւ անբարոյական են․․․վերբալ մարմնավաճառությունը ՀՀ-ում ավելի թանկ հաճույք է, քան սովորականը»։
Ելույթն ամբողջությամբ՝ տեսանյութում
Լուիզա ՍՈՒՔԻԱՍՅԱՆ
