«Մենք այսպես թե այնպես 30 տարի Թուրքիայի հետ առեւտուր ենք արել: Չնայած չենք ունեցել անմիջական սահման, Վրաստանի միջոցով է ապրանքաշրջանառությունը տեղի ունեցել, բայց ունեցել ենք իրենց հետ առևտուր, Թուրքիան եղել է Հայաստանի թոփ-5 առեւտրային գործընկերներից մեկը եւ այդ առումով խնդիր չենք տեսել: Եթե մենք այդ տրամաբանությամբ ենք նայում, պիտի ընդհանրապես բոլոր երկրների առջեւ մեր դռները փակենք ու բոլոր երկրները, որոնք մեզնից ավելի մեծ շուկա ունեն, արտադրական հնարավորություններ ունեն, մենք պետք է մեկուսանանք ու տեղում արտադրենք ամեն ինչը»,-այսօր լրագրողների հետ զրույցում խոսելով հայ-թուրքական սահմանի բացման ռիսկերի ու մտահոգությունների մասին, որ փողախեղդ կանեն ու կուլ կտան մեր տնտեսությունը՝ տեսակետ հայտնեց ՔՊ խմբակցության պատգամավոր, ԱԺ տնտեսական հարցերի հանձնաժողովի փոխնախագահ Բաբկեն Թունյանը:
Նա ասաց, որ ԵԱՏՄ-ն ունի պաշտպանական մեխանիզմներ ու պետք է հաշվի առնել, թե որ ուղղություններով կարող ենք զարգացնել տնտեսությունը. «Չեմ կարծում, որ թուրքական էքսպանսիա մեզ սպասում է, լինելու դեպքում կանխարգելիչ միջոցառումներ պետք է լինեն»:
Հարցին՝ հասարակության մտահոգությունն այն է, որ Թուրքիան ու Ադրբեջանը Հայաստանի թշնամիներն են, անվտանգային խնդիրներ կան՝ Թունյանը պատասխանեց. «Եթե հասարակությունն այդ մտավախությունն ունի, ուրեմն հասարակությունն էլ պետք է այդ հակաքայլն անի ու թուրքական արտադրության ապրանք չգնի»:
Կարդացեք նաև
Ըստ Թունյանի, պետք է կշռել՝ մտավախությունն այն է, որ թուրքական ապրանքները կգան ու մեր շուկան կողողե՞ն, թե՞ այն, որ ապրանքների գները շատ բարձր կլինեն ու մարդիկ այլընտրանք չեն ունենա. «Եթե մենք միայն սպառողի տեսանկյունից ենք խոսում, նաեւ արտադրողների տեսանկյունից պետք է մոտենանք, հումքի մեծ մասը գալիս է Թուրքիայից, այլ ճանապարհներն ավելի թանկ են ու եթե փորձեն թուրքական ապրանքների այլընտրանքը փնտրեն, մրցունակությունը կկորցնեն»:
Հետո Բաբկեն Թունյանը հայտարարեց. «Երբ որ թուրքական կապիտալը գոնե քիթը ցույց կտա Հայաստանի սահմանների մոտ, այդ ժամանակ կմտածենք, թե եղած միջոցառումների վրա ինչ կարելի է ավելացնել: Սատանան այդքան սարսափելի չի, ինչքան թվում է»:
Հռիփսիմե ՋԵԲԵՋՅԱՆ
