«Ես շատ հարգում եմ առաջին նախագահ Լեւոն Տեր-Պետրոսյանին, համարում եմ քաղաքական հայտարարություն»,- ՔՊ խմբակցության պատգամավոր Խաչատուր Սուքիասյանն այսօր այսպես պատասխանեց Տեր-Պետրոսյանի գնահատականին՝ ներկայիս ներքաղաքական իրավիճակի մասին:
Հիշեցնենք, որ ՀՀ առաջին նախագահն ասել էր. «Փաշինյանական վարչախումբը, միջոցների մեջ խտրություն չդնելով, ամեն գնով ձգտում է պահպանել իշխանությունը: 2. Քոչարյանի և Սարգսյանի ղեկավարած ընդդիմությունը, ներքին հակասություններով հանդերձ, նույնպես միջոցների մեջ խտրություն չդնելով, ամեն գնով ձգտում է զավթել իշխանությունը: 3. Ըստ այդմ, երեք ճամբարներում էլ իսպառ բացակայում է պետական շահի գիտակցությունը, ինչի անխուսափելի հետևանքը մեր ազգին սպառնացող նորանոր աղետներն են»:
Խաչատուր Սուքիասյանի խոսքով՝ առաջին նախագահը երբեմն նման քաղաքական հայտարարություններ անում է, իր տեսակետներն ունի, բայց հաշվի առնելով, որ նա երկար ժամանակ է՝ չի կառավարում ՀՀ-ն, քաղաքական հայտարարությունների իրավունքը միշտ ունեցել է ու ունի. «Նպատակը չեմ կարող ասել, որովհետեւ Լեւոն Տեր-Պետրոսյանը վերջին հաշվով ՀԱԿ կուսակցության նախագահն է, այնպես որ, ամեն մի քաղաքական համակարգ հնարավոր է իր տեսակետներն ունենա ու արտահայտվի, այնպես, ինչպես իր քաղաքական թիմին է հարիր»:
Հարցին՝ հետեւություններ անո՞ւմ եք՝ նա պատասխանեց. «Ցանկացած փորձ ունեցող մարդու մտքերը պետք է բոլորի համար հետեւության առիթ դառնան ու նյութ դառնան ե՛ւ իշխանության համար, ե՛ւ ֆիզիկական անձի համար»:
Կարդացեք նաև
Հարցին՝ նրա օրոք, ասում են, ընտրությունները կեղծվել են, դուք ի՞նչ կարծիք ունեք՝ Սուքիասյանը պատասխանեց. «Ես իրավական համակարգում չեմ եղել, չեմ կարող ճշգրիտ լինել: Դա կարող են ասել այն մարդիկ, ովքեր կա՛մ քաղաքական համակարգում են եղել, կա՛մ իրավական»:
Հռիփսիմե ՋԵԲԵՋՅԱՆ
