«Զարմանում եմ Ռուբեն Ռուբինյանի զարմանքից։ Ընդամենը ուզում ենք իշխանությանը դրդել պարզաբանել, թե ինչ գործընթաց կա Թուրքիայի հետ»,-ԱԺ լիագումար նիստում այսօր հայտարարեց «Հայաստան» դաշինքի պատգամավոր Ագնեսա Խամոյանը՝ անդրադառնալով խորհրդարանի փոխնախագահ, ՀՀ-Թուրքիա երկխոսության հայկական կողմի հատուկ ներկայացուցիչ Ռուբեն Ռուբինյանի պնդմանը, թե գաղտնի գործընթաց չկա։
«Նա ասում է, թե որեւէ բան չենք իմացել Թուրքիայից։ Հիշեցնեմ, որ այդ մասին ասել է Չավուշօղլուն, իսկ հաջորդ օրը մենք ենք իմացել ԱԳՆ-ից։ Նորից եմ հարցնում, թե ի՞նչ կառուցողական հանդիպում է եղել Թուրքիայի ներկայացուցիչի հետ։ Ինչո՞ւ, երբ այս դահլիճում ժամանակին խոսվեց Ռուբինյանի՝ Թուրքիայում ուսանելու եւ ազդեցության գործակալ լինելու մասին, այդ հարցերը պարզաբանումներ չստացան»,-նշեց Խամոյանը։
Պատգամավորը նկատեց՝ իշխանության ներկայացուցիչները, այդ թվում՝ Ռուբինյանը, պնդում են, թե ռուսական կողմն է ՀՀ-Թուրքիա երկխոսության միջնորդը, մինչդեռ ամիսներ առաջ Էրդողանն ասել էր, որ Նիկոլ Փաշինյանն իրեն հանդիպման առաջարկ է արել Վրաստանի վարչապետի միջոցով․ «Փաշինյանը դա չի հերքել։ Հիմա դժվար է հասկանալ՝ ձեր հարաբերությունների կարգավորման միջնորդն ո՞վ է եղել։ Պետք չի այստեղից մուննաթ գալ։ Դուք «ամենաթափանցիկ» իշխանությունն էք եւ այս հարցերին պետք է պատասխանեիք առանց մեր հարցադրումների»։
Լուիզա ՍՈՒՔԻԱՍՅԱՆ
