«Հունվարի 13-ին ԱԺ նախագահը ստորագրել է կարգադրություն, ըստ որի՝ հունվարի 13-15-ը Մոսկվա է գործուղվել ԱԺ փոխնախագահ Ռուբեն Ռուբինյանը։ Նա Մոսկվայում հանդիպել է Թուրքիայի բանագնացին։ Նա ԱԺ-ի կողմի՞ց է բանակցություններ վարել Սերդար Քըլըչի հետ։ Ի՞նչ նպատակով է ԱԺ բյուջեի հաշվին մեկնել Մոսկվա»,-ԱԺ լիագումար նիստում այսօր խորհրդարանի փոխնախագահ Հակոբ Արշակյանից հետաքրքրվեց «Հայաստան» դաշինքի պատգամավոր Գեղամ Մանուկյանը։
Արշակյանը պատասխանեց․ «Ինչպես գիտեք, պետության կողմից բանագնաց է ներկայացված, ուստի բանագնացի ծախսերը նույնպես պետությունն է հոգում»։
Մանուկյանը հարցրեց, թե ի՞նչ որոշման կամ կարգադրութան հիման վրա է Ռուբինյանը նշանակվել բանագնաց․ «Էրդողանի դեպքում հրամանագիր կա։ Բայց մեր դեպքում ԱԺ-ն Ռուբինյանին լիազորե՞լ է որպես բանագնաց՝ Թուրքիայի հետ բանակցություններ վարելու համար։ ԱԺ խորհրդում հարցը քննարկվե՞լ է։ ԱԳՆ մամուլի քարտուղարի՝ մամուլին տրված պատասխանից է միայն պարզ, որ Ռուբինյանը բանագնաց է»։
Արշակյանը նշեց․ «Ամեն դեպքում կա պատվիրակություն, պատվիրակության ղեկավար եւ այն, թե ինչ ֆինանսավորմամբ է պատվիրակությունը գործուղվում։ Այս դեպքում էլ բոլոր պահանջները պահպանվել են»։
Կարդացեք նաև
Լուիզա ՍՈՒՔԻԱՍՅԱՆ
